वालिङ । नेपाली कांग्रेसका उपसभापति धनराज गुरुङले निर्वाचित जनप्रतिनिधिहरूले गफभन्दा पनि काम गरेर देखाउनुपर्ने बताएका छन् ।
गएको मंसिरमा भएको प्रतिनिधिसभा र प्रदेशसभा सदस्य निर्वाचनमा स्याङ्जा क्षेत्र नम्बर–२ बाट विजयी भएसँगै मतदातालाई धन्यवाद दिनेक्रममा शनिबार वालिङ–८, बीपीचोकमा आयोजित कार्यक्रममा उनले कामबाट प्रमाणित गर्नुपर्ने जिम्मेवारी आफूमाझ रहेको बताए ।
“जनता धेरै सचेत हुनुहुन्छ, धेरै बुझ्नुभएको छ । नेताले गफ बढी गर्छन्, काम गर्दैनन् भन्ने बुझाइ छ,” उनले भने, “यो पाँच वर्षमा देखिने गरी काम गर्नुपर्छ । काम देखे मात्र जनताले विश्वास गर्नुहुन्छ । नत्र यी पनि उस्तै हुन् पक्कै भन्नुहुनेछ ।”
स्याङ्जा–२ का जनताले निर्वाचनका बेला अमूल्य मत दिएर आफूलाई विजयी गराएकाले पनि यहाँको विकास निर्माण तथा जनताको जीवनस्तर परिवर्तन गर्ने उनले बताए ।
निर्वाचनका बेला जनतामाझ गरेका प्रतिबद्धता पूरा गरेरै छाड्ने उनले जिकिर गरे । “यहाँका जनताले नेपाली कांग्रेस तथा मलाई विश्वास गरेर जिम्मेवारी बोकाइदिनुभएको छ,” उनले भने, “जनताको अमूल्य मतबाट प्राप्त जिम्मेवारीलाई पूरा गरेरै छाड्छु । विश्वस्त हुनुहोस्, बीचमै छाड्दिनँ ।”
धन्यवाद ज्ञापन गर्ने क्रममा गण्डकी प्रदेशसभा सदस्य भोजराज अर्याल, कल्पना तिवारीले निर्वाचनका बेला आफूहरूले अगाडि सारेको घोषणापत्रको पूर्ण कार्यान्वयनमा जोड दिने प्रतिबद्धता जनाए । विजयी भएका प्रतिनिधिसभा र प्रदेशसभा सदस्यले कार्यतालिका नै बनाएर मतदातालाई धन्यवाद दिन घरदैलो तथा टोलटोलमा पुगेका हुन् । रासस