कास्की । घरेलु टोली गण्डकी प्रदेश र सशस्त्र प्रहरीको एफीएफ क्लब पोखरामा भएको ‘तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुला क्लब च्याम्पियनसिप महिला तथा पुरुष भलिबल प्रतियोगिता, २०७९’ च्याम्पियन भएका छन् ।
पोखरा रंगशालामा शनिबार सम्पन्न प्रतिस्पर्धात्मक फाइनल खेलमा पुरुषतर्फ सशस्त्र प्रहरीको एपीएफलाई ३–२ को सेटमा पराजित गर्दै घरेलु टोली गण्डकीले उपाधिसँगै नगद पाँच लाख रुपैयाँ पुरस्कार पायो ।
महिलातर्फ त्रिभुवन आर्मी क्लबलाई पराजित गरी एपीएफले लगातार दोस्रोपटक उपाधि जित्यो । एपीएफ अघिल्लो संस्करणको विजेता हो ।
पुरुषतर्फको फाइनलमा घरेलु दर्शकको साथ पाएको गण्डकीले पहिलो सेट २५–१६ ले एपीएफलाई सुम्पियो । दोस्रो र तेस्रो सेटमा उत्कृष्ट प्रदर्शन गर्दै क्रमशः २५–१८ र २५–१९ ले खेल आफ्नो पक्षमा पार्न गण्डकी सफल भयो । चौथो सेटमा गण्डकीले अग्रता जोगाउन नसक्दा २८–२६ ले एपीएफलाई नतिजा सुम्पियो ।
निर्णायक सेटको खेलमा गण्डकीले एपीएफलाई सुरुआतबाटै अग्रता बनाउँदै दबाबमा राख्न सफल भयो । अन्तिम सेट १५–८ ले आफ्नो पक्षमा पार्दै गण्डकीले दोस्रोपटक उपाधि चुम्दा एपीएफ उपविजेता बनेर दुई लाख ५० हजार रुपैयाँ नगदसहित ट्रफी पुरस्कार पाउन सफल भयो ।
महिलातर्फको प्रतिस्पर्धामा पहिलो सेट २५–२० ले जितेको एपीएफले दोस्रो सेट आर्मीलाई २५—२२ ले सुम्पियो । तेस्रो सेटमा २५–८ ले खेल आफ्नो पक्षमा पारेको एपीएफले चौथो सेट २५–२२ अंकले जित्दै विजेता बनेको हो । च्याम्पियन एपीएफले नगद पाँच लाख रुपैयाँ पुरस्कार प्राप्त गर्दा उपविजेता आर्मीले दुई लाख ५० हजार पुरस्कारमा चित्त बुझायो ।
प्रतियोगितामा पुरुषतर्फ नेपाल पुलिस क्लबले तेस्रो स्थान हासिल गर्न सफल भएको छ । साविक विजेता समेत रहेको आर्मीलाई ३–१ को सेटमा पराजित गर्दै पुलिसले तेस्रो स्थानसहित एक लाख २५ हजार रुपैयाँ पुरस्कार पायो । आर्मीले चौथो स्थान हासिल गर्दै ६५ हजार रुपैयाँ पुरस्कार पायो ।
महिलातर्फ होङवान्जी न्यु डायमन्ड स्पोर्ट्स क्लबले तेस्रो स्थान प्राप्त गर्यो । न्यु डायमन्डले नगद एक लाख २५ हजार प्राप्त गर्दा प्रतियोगितामा चौथो स्थान प्राप्त गरेको गण्डकीले नगद ६५ हजार रुपैयाँ हात पार्यो ।
प्रतियोगितामा महिलातर्फ एपीएफका सरस्वती चौधरी र पुरुषतर्फ गण्डकीका रवि केसी सर्वोत्कृष्ट खेलाडी घोषित हुँदै जनही २५ हजार र ट्रफी पुरस्कार प्राप्त गरे ।
उत्कृष्ट पाँच विधामा महिलातर्फ उत्कृष्ट सेटर न्यु डायमन्डका प्रगतिनाथ, सर्भर गण्डकीका अरुणा शाही, ब्लकर आर्मीका संगम महतो, लिब्रो आर्मीका सरस्वती जैसी, स्पाइकर एपीएफका निरुता ठगुन्ना र प्रशिक्षक एपीएफका महेश चौधरी घोषित भए ।
पुरुषतर्फ उत्कृष्ट सेटर गण्डकीका विवश आले, लिब्रो एपीएफका विनोद चन्द, सर्भर गण्डकीका घनश्याम चौधरी, स्पाइकर एपीएफका टेकराज वस्ती, ब्लकर गण्डकीका नितिश र प्रशिक्षक गण्डकीका रमेश केसी घोषित भए ।
प्रतियोगितामा विजेता टोली तथा उत्कृष्ट खेलाडीलाई राष्ट्रिय खेलकुद परिषद्का सदस्यसचिव टंकलाल घिसिङ, गण्डकी प्रदेशसभा सदस्यद्वय लीलाबहादुर थापा, प्रकाश बराल व्यक्तिलगायतले नगद, ट्रफी, मेडल र प्रमाणपत्र वितरण गरेका थिए ।
भलिबल खेलको विकास गरी देशका लागि आवश्यक राष्ट्रिय र अन्तर्राष्ट्रियस्तरका खेलाडी उत्पादनको लक्ष्यसहित टाइगर ग्रुप अफ पोखरा नेपालले यही माघ ८ गतेदेखि प्रतियोगिता आयोजना गरेको हो । रासस
