विराटनगर । नेपाली कांग्रेसका नेता डा. शेखर कोइरालाले आफ्नो पार्टीले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिएको विषयमा धेरै विवाद गर्न नहुने बताएका छन् ।
विराटनगर विमानस्थलमा बुधबार पत्रकारहरुसँग कुराकानी गर्दै कोइरालाले यस सम्बन्धमा च्याप्टर क्लोज भएको बताए । "कांग्रेस अब प्रमुख विपक्षी हो र वेटिङ गर्भमेन्ट पनि हो," उनले भने ।
पहिले पनि कांग्रेसले साढे तीन वर्षसम्म विपक्षीको भूमिका निर्वाह गरेको भन्दै उनले अब सदनमा आफूहरु प्रमुख विपक्षी भएको र सरकार ढाल्न लाग्ने पनि बताए । भने, "हामी प्रतिपक्षको भूमिका गर्छौं सरकार ढाल्न पनि लागि पर्छौँ ।"
भर्खरै काठमाडौँमा आफूहरुले वैचारिक समूहको बैठक राख्दा त्यहाँ पनि विश्वासको मतको विषयका छलफल भएको सुनाए । त्यस विषयमा आफूले बोल्दै नबोलेको कुरालाई सञ्चारमाध्यमले उल्लेख गरेको कोइरालाको भनाइ थियो ।
उनले कांग्रेसले राष्ट्रपति पदमा उम्मेदवारी दिने बताए । "यस विषयमा सबै दलसँग छलफल गर्दैछौँ" उनले भने । सबैतिर वामपन्थीमात्र नहुने भन्दै राष्ट्रपति कांग्रेसको हुनुपर्नेमा आफूहरु स्पष्ट भएको बताए ।
डा. कोइरालाले युवा उद्यमी प्रेमप्रसाद आचार्यको आत्मदाहको घटनाले नेपालको आर्थिक, राजनीतिक र सांस्कृतिक अवस्थाबारे गम्भीर प्रश्न उठेको चर्चा गरे ।