site stats
खेल
न्युजिल्यान्डविरुद्धको एकदिवसीय शृङ्खलामा भारतको 'क्लिन स्विप'

काठमाडौं । अन्तिम खेलमा ९० रनको फराकिलो जित निकालेसँगै न्युजिल्यान्डविरुद्धको एकदिवसीय अन्तर्राष्ट्रिय शृङ्खला घरेलु टिम भारतले 'क्लिन स्विप' गरेको छ ।

इन्दोरस्थित होल्कर क्रिकेट रंगशालामा सम्पन्न अन्तिम एकदिवसीय खेलमा भारतले प्रस्तुत गरेको ३८६ रनको विशाल लक्ष्य पछ्याएको न्युजिल्यान्ड ४१.२ ओभरमा २९५ रनमै समेटियो ।

न्युजिल्यान्डका डिभोन कोन्वेले १०० बलमा १२ चौका र आठ छक्कासहित १३८ रन बनाए पनि टिमलाई जितसम्म डोहोर्‍याउन सकेनन् । यसबाहेक, हेनरी निकोलसले ४२, मिचेल सन्टनरले ३४, माइकल ब्रासवेलले २६ र डार्यल मिचेलले २४ रन बनाए । 

NMB Bank
Dabur nepal
Agani Group

भारतका शार्दुल ठाकुर र कुलदीप यादवले समान तीन विकेट लिए । युजवेन्द्र चहलले दुई विकेट लिँदा हार्दिक पण्ड्या र उमरन मलिकले एक-एक विकेट लिए ।

यसअघि, ओपनरद्वय सुबमन गिल र कप्तान रोहित शर्माले शतक बनाएपछि टस हारेर ब्याटिङमा आएको भारतले निर्धारित ५० ओभरमा नौ विकेट गुमाएर ३८५ रनको योगफल तयार पारेको थियो । 

Global bank

भारतका गिलले ७८ बलमा १३ चौका र पाँच छक्कासहित सर्वाधिक ११२ रन जोडे । यस्तै, कप्तान रोहित शर्माले ८५ बलमा नौ चौका र ६ छक्कासहित १०१ रन बनाए । यी दुई ओपनरले पहिलो विकेटका लागि २१२ रनको साझेदारी गर्दै भारतलाई उत्कृष्ट सुरुआत दिलाएका थिए । 

यसबाहेक हार्दिक पण्ड्याले ५४, विराट कोहलीले ३६, शार्दुल ठाकुरले २५, इसान किसनले १७ र सूर्यकुमार यादवले १४ रन बनाए ।

न्युजिल्यान्डका ज्याकोब डुफी र ब्लाएर टिकनरले समान तीन विकेट लिए । यस्तै, माइकल ब्रासवेलले एक विकेट लिए ।

यसअघि, भारतले पहिलो खेलमा १२ रनको र दोस्रो खेलमा आठ विकेटको जित निकालेको थियो । 

प्रकाशित मिति: मंगलबार, माघ १०, २०७९  २३:०३
प्रतिक्रिया दिनुहोस्
सम्पादकीय