काठमाडौं । अखिल नेपाल फुटबल संघ (एन्फा) ले देशभर हुने विभिन्न नकआउट फुटबल प्रतियोगिताहरुको क्यालेन्डर सार्वजनिक गरेको छ । 

एन्फाले मंगलबार देशभर हुने विभिन्न नकआउट तथा गोल्डकप प्रतियोगिताहरुको मिति सार्वजनिक गरेको हो । 

एन्फाले सार्वजनिक गरेको क्यालेन्डरअनुसार सर्लाहीको वाग्मतीमा हुने राजर्षी गोल्डकप र महोत्तरीमा हुने मेयर कप फुटबल प्रतियोगिताले लागि माघ २६ गतेदेखि फागुन ६ गतेसम्मको समय पाएका छन् । 

मकवानपुरमा हुने मकवानपुर गोल्डकपका लागि माघ २९ गतेदेखि फागुन नौ गते, झापामा हुने भद्रपुर गोल्डकप र रुपन्देहीमा हुने तिलोत्तमा गोल्डकपका लागि फागुन सात गतेदेखि फागुन ११ गतेसम्म, काठमाडौंमा हुने केपी ओली कपका लागि फागुन ११ गतेदेखि फागुन १७ गतेसम्मको लागि समय उपलब्ध गराइएको छ ।

यस्तै, सुनसरीमा हुने बुढासुब्बा गोल्डकपका लागि फागुन १३ देखि २० गतेसम्म, ईलाममा हुने माइभ्याली गोल्डकप र सुनसरीमा हुने इटहरी गोल्डकपका लागि चैत चार गतेदेखि ११ गतेसम्म, मोरङमा हुने विराट गोल्डकप र बारामा हुने सिमरा गोल्डकपका लागि चैत नौ गतेदेखि चैत १८ गतेसम्मको मिति उपलब्ध गराइएको छ ।