काठमाडौं । राष्ट्रिय खेलकुद विकास ऐन, २०७७ अन्तर्गत कसूरमा संलग्न रहेको आरोपमा पक्राउ परेका दुईजना खेलाडीलाई प्रहरीले सार्वजनिक गरेको छ ।
पक्राउ पर्नेहरुमा सप्तरी राजविराज नगरपालिका–३ बस्ने ४१ वर्षीय महबुब आलम र बारा सिम्रौनगढ नगरपालिका–३ बस्ने २० वर्षीय मोहमद आदील अन्सारी रहेका छन् । आदिल राष्ट्रिय टोलीका सदस्य हुन् भने मेहबुब पूर्वराष्ट्रिय खेलाडी हुन् ।
उनीहरुमध्ये महबुब मोरङ विराटनगर महानगरपालिका–१ शान्ति चोकबाट र आदील सप्तरी राजविराज नगरपालिका–५ लंका टोलबाट पक्राउ परेका हुन् ।
नेपाल क्रिकेट संघको आयोजना तथा सेभेन थ्री स्पोर्ट्स प्रालिको रणनीतिक तथा व्यावसायिक साझेदारीमा कीर्तिपुरको क्रिकेट मैदानमा गत पुस ९ देखि २७ गतेसम्म सञ्चालन भएको नेपाल टी–२० क्रिकेट लिगका खेलमा उनीहरुले फिक्सिङ गरेको देखिएपछि पक्राउ परेका हुन् ।
लिगको प्रतिस्पर्धाबाट आउने स्वाभाविक परिणामलाई प्रतिकूल हुने, बाजी जिताउने वा हराउने उद्देश्यले खेलमा मिलोमतो गरेको अनुसन्धानबाट खुलेको सीआईबीले जनाएको छ ।
पूर्वराष्ट्रिय क्रिकेट खेलाडीसमेत रहेका महबुबले कम्तीमा दुईजना नेपाली खेलाडीलाई आर्थिक प्रलोभन देखाई स्पट फिक्सिङ गर्ने प्रयास गरेको, मोहमद आदीललाई एउटा नो बल र एउटा वाइड बल फाल्नको लागि एप्रोच आएकोमा उनले खेलेका कम्तीमा दुईवटा खेलमा सोही प्रकृतिको खेल खेलेको प्रारम्भिक अनुसन्धानबाट खुलेको छ ।
उक्त प्रतियोगिताको मुख्य प्रायोजकको रूपमा रहेको वनएक्सबेटले खेलकुदसँग सम्बन्धित समाचारको लागि तथा पूर्वानुमान गर्नको लागि भरपर्दो स्रोत भन्ने दाबी गर्ने गरेको र निकट भविष्यमा क्रिकेट खेलसँग सम्बन्धित पोशाक तथा सामग्रीहरू बजारमा उपलब्ध हुने दाबी गरेकोमा हालसम्म बजारमा बिक्री वितरणको लागि कुनै पनि सामग्री उपलब्ध नभएको समेत छानबिनको क्रममा खुल्न आएको छ ।
यसबाहेक प्रतियोगितामा सहभागी केही फ्रेन्चाइज टिमहरूको आर्थिक र खेलाडीहरूलाई दिने पारिश्रमिकको स्रोत नखुलेको पाइएको छ ।
विभिन्न व्यवस्थापकको भूमिकामा रहेका केही व्यक्ति, खेलाडीसँग सम्पर्कमा भएका व्यक्ति र खेलमा सहभागी खेलाडीहरू समेत स्पट फिक्सिङमा संलग्न भएको तथ्य र आधार फेला परेको प्रारम्भिक अनुसन्धानमा खुलेको सीआईबीले जनाएको छ ।
घटनामा संलग्न अन्यको खोजी भइरहेको सीआईबीले जनाएको छ ।