काठमाडौं । विभागीय क्लब एपीएफको महिला टिमले मंगलबार टाइगर कप अन्तर्राष्ट्रिय आमन्त्रण क्लब भलिबल च्याम्पियनसिपमा लगातार दोस्रो जित निकालेको छ ।
प्रतियोगितामा लगातार दोस्रो जित निकाल्ने क्रममा एपीएफले मंगलबार पोखरा रंगशालाको कोर्टमा भएको खेलमा न्यु डायमन्ड स्पोर्ट्स क्लबलाई ३–० को सोझो सेटमा पराजित गर्यो ।
एपीएफले न्यु डायमन्डविरुद्धको खेल २५–१५, २५–२०, २५–७ को स्कोरमा खेल आफ्नो पक्षमा पार्यो । एपीएपले यसअघि पहिलो खेलमा गण्डकी प्रदेशमाथि ३–० को सोझो सेटमै जित निकालेको थियो ।
मंगलबारै भएको महिलातर्फको दोस्रो खेलमा त्रिभुवन आर्मी क्लबले गण्डकी प्रदेशलाई ३–० को सोझो सेटमा हरायो । आर्मीले गण्डकीविरुद्ध २५–१०, १५–१६, २५–१६ को स्कोरमा जित निकाल्यो ।
टाइगर कपमा महिलातर्फ चार टोलीले प्रतिस्पर्धा गरेका छन् । राउन्ड रोबिन लिगपछि हुने सेमिफाइनलमा शीर्ष टिमले चौथो स्थानमा रहेको टिमसँग र दोस्रो स्थानमा रहने टिमले तेस्रो स्थानमा रहने टिमसँग प्रतिस्पर्धा गर्नेछ ।
प्रतियोगिताको पुरुषतर्फ पाँच टिमले प्रतिस्पर्धा गर्नेछन् । पुरुषतर्फ आर्मी, नेपाल पुलिस क्लब, गण्डकी, एपीएफ र श्रीलंकाको सेन्ट जोसेफ वाच स्पोटर््स क्लब सहभागी छन् । प्रतियोगिताको दुबैतर्फको विजेताले समान चार लाख रुपैयाँ पुरस्कार प्राप्त गर्नेछन् ।