काठमाडौं । ह्यारी केनको कीर्तिमानी गोलमा टोटनहमले सोमबार राति इङ्लिस प्रिमियर लिगमा फुलहममाथि १–० को विजय हासिल गरेको छ । इङल्यान्डका फरवार्ड केनले टोटनहमबाट सबैभन्दा धेरै गोल गर्ने जिम्मी ग्रीभ्सको कीर्तिमानसँग बराबरी गरेका हुन् ।
केनले पहिलो हाफको इन्जुरी समयमा गरेको गोल टोटनहमको जितमा निर्णायक बन्यो । केनले ह्युङ–मिन सनको पासमा गोल गरेका थिए । लन्डन क्लब टोटनहमबाट केनको यो २६६औँ गोल हो ।
केनले स्व. जिम्मी ग्रीभ्सको कीर्तिमान बराबरी गरेका छन् । ग्रीभ्सले ३७९ खेलमा २६६ गोल गरेका थिए । इङ्ग्ल्यान्डका कप्तान केनले ४१५ खेलमा यो सफलता हासिल गरेका हुन् ।
जितपछि टोटनहमले २१ खेलबाट ३६ अंक जोडेको छ । जुन चौथो स्थानको म्यानचेस्टर युनाइटेडभन्दा तीन अंकले पछाडि हो । छैटौँ स्थानको ब्राइटनभन्दा पाँच अंकले अगाडि हो । तथापि, टोटनहमले एक खेल बढी खेलेको छ । पराजित फुलहम ३१ अंकका साथ सातौँ स्थानमा छ । जुन ब्राइटनसँग अंक बराबरी हो । तर, ब्राइटनले दुई खेल कम खेलेको छ ।