काठमाडौं । काइलियन एमबाप्पेले पाँच गोल गरेपछि पेरिस सेन्ट जर्मेन (पीएसजी)ले सोमबार राति छैटौँ श्रेणी लिगको क्लब पेस डे क्यासललाई ७–० ले हराउँदै फ्रेन्च कपको अन्तिम–१६ मा स्थान बनाएको छ ।
पेस डे क्यासलले यस प्रतियोगिताको अन्तिम–३२ मा स्थान बनाउनेक्रममा तीन खेल जितिसकेको थियो । एमबाप्पेले गोल गर्न सुरु गर्नुअघि घरेलु टोली २९ मिनेटसम्म टिक्न सफल भएको थियो ।
२९औँ मिनेटमा एमबाप्पेले गरेको गोलबाट पीएसजीले अग्रता लिएको थियो । त्यसको चार मिनेट वित्न नपाउँदै नेयमारले पीएसजीको अग्रता दोब्बर बनाए । ३४औँ मिनेटमा एमबाप्पेले व्यक्तिगत दोस्रो गोल गरे । ४०औँ मिनेटमा तेस्रो गोल थपे । ५६औँ मिनेटमा चौथो गोल गरेका एमबाप्पेले ७९औँ मिनेटमा पाँचौं गोल गरेका थिए । त्यसअघि ६४औँ मिनेटमा कार्लोस सोलरले गोल गरेका थिए ।
फ्रान्सका स्ट्राइकर एमबाप्पेले जारी सिजन सबै प्रतियोगितामा गरी २३ गोल गरिसकेका छन् । एमबाप्पेले गत डिसेम्बरमा सम्पन्न फिफा विश्वकप फाइनलमा अर्जेन्टिनाविरुद्ध ह्याट्रिक गरेका थिए । तथापि, फ्रान्स अर्जेन्टिनासँग पेनाल्टी सुटआउटमा पराजित भएको थियो । त्यसयता एमबाप्पे चार खेलमा ६ गोल गरिसकेका छन् ।
पीएसजीका लागि कुनै खेलाडीले एकै खेलमा पाँच गोल गरेको यो पहिलो पटक हो । गएराति लियोनल मेसी बेन्चमा थिए भने एमबाप्पे र नेयमारले पूरा ९० मिनेट खेले । पीएसजीले आफ्नो कीर्तिमान १४औँ फ्रेन्च कपको उपाधि जित्ने लक्ष्यमा छ ।
