काठमाडौं । २१ पटकका ग्रान्डस्लाम च्याम्पियन नोभाक जोकोभिचले वर्षको पहिलो ग्रान्डस्लाम अस्ट्रेलियन ओपनको सेमिफाइनल प्रवेशका लागि वरीयता पाँचौ स्थानका एन्ड्रे रुबलेभविरुद्ध खेल्ने भएका छन् ।
सोमबार भएको चौथो चरणको खेलमा अस्ट्रेलियाका एलेक्स डे मिनाउरलाई ३–० को सोझो सेटमा पराजित गर्दै जोकोभिचले अन्तिम आठको खेलमा रुबलेभसँगको भेट पक्का गरेका हुन् ।
मेलबर्नस्थित रोड लभेर एरिनामा सम्पन्न खेलमा चौथो स्थानका जोकोभिचले २२औँ स्थानका मिनाउरविरुद्ध ६–२, ६–१, ६–२ को स्कोरमा जित निकाले ।
विम्बल्डन च्याम्पियन जोकोभिचले गत वर्ष अस्ट्रेलियन ओपन खेलेका थिएनन् । जोकोभिचले हालसम्म नौपटक प्रतियोगिताको उपाधि जितेका छन् ।
यसअघि भएको चौथो चरणको खेलमा रुसका रुबलेभले डेनमार्कका हल्गर रुनलाई ३–२ को सेटमा जित निकाल्दै क्वार्टरफाइनलमा स्थान पक्का गरे ।
वरीयताको नवौँ स्थानका रुनलाई रुबलेभले ६–३, ३–६, ६–३, ४–६, ७–६ (११–९) को स्कोरमा पराजित गरे ।