काठमाडौं । नेपाल प्रोफेसनल गल्फर एसोसिएसनले आयोजना गर्ने सूर्य नेपाल गल्फ टुरको सूर्य नेपाल एनपीजीए म्याच प्ले मंगलबारदेखि हुने भएको छ ।
काठमाडौंस्थित रोयल नेपाल गल्फ क्लबंमा हुने प्रतियोगितामा गत सिजन २०२१÷२२ को शीर्ष १६ गल्फरले प्रतिस्पर्धा गर्ने बताइएको छ । माघ १२ गतेसम्म हुने प्रतियोगितामा फाइनलबाहेकका खेल १८ होलमा खेलाइनेछ । फाइनल खेल भने ३६ होलमा खोलाइनेछ ।
माघ १० गते पहिलो दिन पहिलो चरणका आठ खेल हुनेछन् । माघ ११ गते चार क्वार्टरफाइनल र सेमिफाइनलका खेल हुनेछन् । फाइनल खेल अन्तिम दिन माघ १६ गते हुनेछ । त्यस्तै, तेस्रो स्थानको लागि हुने खेल पनि अन्तिम दिन हुनेछ ।
प्रतियोगितामा गत सिजन शीर्ष स्थानमा रहन सफल सक्रबहादुर राईले २० औँ वरीयताका टंकबहादुर कार्कीसँग प्रतिस्पर्धा गर्नेछन् । दोस्रो वरीयताका भुवन नगरकोटीले १९ औँ वरीयताका संजोक मोक्तानविरुद्ध प्रतिस्पर्धा गर्नेछन् । तेस्रो वरीयताका जयराम श्रेष्ठले १७ औँ वरीयताका कृष्णमान श्रेष्ठसँग प्रतिस्पर्धा गर्नेछन् ।
चौथो वरीयताका नीरज तामाङले १४ औँ वरीयताका राजेन्द्र थापामगरविरुद्ध खेल्नेछन् । १६ औँ वरीयताका पूर्ण शर्मा र १८ औँ वरीयताका तिर्थ पौडेल विदेशमा भएका कारण प्रतियोगितामा सहभागी हुनेछैनन् ।
पाँचौँ वरीयाताका रवि खड्काले १५ औँ वरीयाताका प्रदीपकुमार लामाविरुद्ध खेल्नेछन् । छैटौँ वरीयताका सञ्जय लामाले १३ औँ वरीयताका रमेश अधिकारीसँग प्रतिस्पर्धा गर्नेछन् । सातौँ वरीयताका दिनेश प्रजापतिले १२ औँ वरीयताका सूर्यप्रसाद शर्मासँग प्रतिस्पर्धा गर्नेछन् । आठौँ वरीयाताका धनबहादुर थापाले ११ औँ वरीयाताका बलबहादुर राईविरुद्ध खेल्नेछन् । नवौँ वरीयताका रामे मगरले दशौँ वरीयताका भुवनकुमार रोकासँग प्रतिस्पर्धा गर्नेछन् ।
प्रतियोगिताको विजेताले ६० हजार रुपैयाँ नगद पुरस्कार जित्नेछन् । उपविजेताले ४२ हजार, तेस्रो हुनेले ३२ हजार तथा चौथो स्थान हासिल गर्नेले २४ हजार रुपैयाँ नगद पुरस्कार जित्नेछन् । क्वार्टरफाइनलबाट बाहिरिने खेलाडीले ११ हजार र पहिलो चरणबाटै बाहिरिने गल्फरले ६ हजार रुपैयाँ नगद पुरस्कार जित्नेछन् ।