काठमाडौं । चलचित्रकर्मी कल्याण कोषमा केही कलाकारले सहयोग रकम जम्मा गरेका छन् । चलचित्र विकास बोर्डमा आज आयोजित कार्यक्रममा कलाकर दीपकराज गिरी, दीपाश्री निरौलालगायतले कोषलाई सहयोग रकम हस्तान्तरण गरेका हुन् ।
दीपक–दीपाले जनही एक लाख १११ रुपैयाँका दरले सहयोग गर्दा निर्मल शर्मा र स्वस्तिमा खड्काले पनि कोषमा रकम जम्मा गरेका छन् । उनीहरू दुवैले जनही ५१ हजार १११ रुपैयाँका दरले कोषमा रकम जम्मा गरेका हुन् । चलचित्रकर्मी महिला सशक्तिकरण समिति संयोजक गीता नेपालले ११ हजार १११ रुपैयाँ कोषमा जम्मा गरेकी छन् ।
नेपाल र भारत दुवै देशमा गीत गाउने गायिका दीपा झाले पनि कोषलाई सहयोग रकम हस्तान्तरण गरेकी छन् । उनले ५ लाख १११ रुपैयाँ सहयोग गरिन् ।
दीपा झाले चलचित्र क्षेत्रले नै आफूहरूलाई अहिलेको उचाइ र सम्मान दिएको भन्दै सहयोग गरेको बताएकी थिइन् ।
हालसम्म कोषमा पाँच करोडभन्दा माथि रकम जम्मा भइसकेको छ । कोषमा १० करोड रकम जम्मा गर्ने योजना रहेको कोषकी सदस्यसमेत रहेकी दीपाश्री निरौलाले बताइन् ।
कोषमा जम्मा भएको रकम कलाकारिता क्षेत्रका व्यक्ति आर्थिक समस्यामा पर्दा उपचार तथा अन्य सामाजिक कार्यमा खर्चिने गरिएको छ ।
चलचित्रकर्मी कल्याण कोषको संयोजक कलाकार वसुन्धरा भुसाल हुन् । उनले सहयोग रकम बुझेकी थिइन् ।
