तिज नजिकै आयो । खुसीको सीमा थिएन रमामा । सानैमा बाआमाबाट विमुख हुनुपरेकाले होला, कुनै पनि चाडपर्व नजिकिँदा ऊ हर्षित हुन्थी । खुसीको मुख्य कारण माइती जान पाउने लोभ थियो ।

तिज नजिकिँदा सधैँ खुसीले फुरुक्क हुन्थी । तर, सधैँ निराश बन्नुपर्दथ्यो । माइतीमा दाजु–भाउजू मात्रै थिए । अरू बेला पनि माइत जाने वातावरण अनुकूल थिएन । जाने बहाना भनेको यिनै चाडपर्व थिए ।

तर, अफसोस ! जब चाडबाड आउँथ्यो, भाउजूका विभिन्न बहाना सुरु हुन्थ्यो । कहिले कता जानुपर्ने, कहिले कता । कहिले छुन नहुने कुरो !

यसपटक तिज आउनै लागेको छ । आफ्नो घरमा पनि चेलीबेटी आउने रौनक बेग्लै छ । सासू दंग छिन् छोरीहरू आउँछन् भनेर । बेलाबेलामा रमालाई पनि सोध्छिन्, “तिमी पनि छिट्टै जान्छ्यौ होला नि ? सबै चेलीबेटीलाई माइत जाने उस्तै रहर त हो !”

रमाले हाँसोसहित मुन्टो हल्लाइन् ।

नभन्दै तिजको दर खाने दिन आयो । छोरीचेली अघिल्लो दिनदेखि नै गाउँ आउन थाले । रमालाई पनि सासूले चेलीको रहर उस्तै हो, अरू बेला पनि त्यति माइतीघर जान्न भनेर छिट्टै बिदा दिने वचन दिएकी थिइन् ।

दर खाने अघिल्लो दिनसम्म पनि रमाले माइत जाने नाम नलिएपछि सासूले सोधिन्, “बुहारी, तिमी पनि जाने होइन माइत ? दाजु–भाउजूले बाटो हेरिराख्नुभएको होला । फेरि, घरबाट बिदा दिएनन् भन्लान् है ।”

सासूको वाक्य सुनेर ऊ मौन भई । माइत जाओस् पनि कसरी ? केही दिनअघि नै उसकी भाउजूले ‘मलाई त नछुने हुने बेला भयो, तिजमा त छेक्छजस्तो छ’ भनेर खबर पठाएकी थिइन् । त्यति सुनेपछि ऊ कसरी जाओस् माइत !

भाउजूले छलेजस्तै उसले पनि सासूलाई छली । भनी, “आमा, म त पर सर्छु कि क्या हो, तल्लो पेट कटकट दुख्न थालेको छ । जाँदाजाँदै छुइ भयो भने के जाने ! म जान्नँ होला ।”

सासूलाई पनि बुहारीप्रति माया लागेर आयो र भनिन्, “तिम्रो त साइत पनि यस्तै पर्दो रहेछ । पोहोर भाउजूलाई नछुने भो भनेर जान पाइनौ । योपटक आफंैँलाई पो । यी आइमाई मान्छेलाई पनि भगवान्ले के सजाय दिनुभएको होला कुन्नि ! त्यसो भए आराम गर । नन्द–आमाजूहरू आउँछन्, रमाइलो गर्छन् । खान्छन्, पिउँछन् । खान त तिमीले पनि भइहाल्छ नि !”

तिज सकिएकै भोलिपल्टदेखि सबै महिलाको तस्बिर धमाधम फेसबुकमा पोस्ट हुन थाले । हेर्दै जाँदा रमाको भाउजूका पनि तस्बिर देखिए, ‘तिजको रमाइलो’ भनेर मन्दिरमा पूजा गर्दै गरेको । पार्टी प्यालेसमा नाच्दै गरेको 

हठात् रमा झस्की । उसले हत्तपत्त फेसबुक बन्द गरी अनि सोच्न थाली— कति बहाना आउँदो रहेछ, चेलीबेटी माइत नआओस् भनेर । यस्तो बहाना मलाई मात्र गर्छन् कि अरूका चेलीबेटीलाई पनि गर्छन् होला ?