काठमाडौं । गीतसंगीतमा रुचि राख्ने कमैलाई थाहा नहोला एकनारायण भण्डारीको नाम । लोक होस् वा आधुनिक उनका सयौं गीत हिट छन् । आम नागरिकको जनजिव्रोमा झुण्डिने शब्द र लयका सर्जक हुन् एकनारायण ।
तर, तिनै एकनारायण अहिले संगीतको औपचारिक शिक्षा लिन थालेका छन् । ललितकला क्याम्पसमा उनले अध्ययन गरिरहेका छन् । “लामो समय सांगीतिक क्षेत्रमा काम गरियो । अब संगीतको औपचारिक शिक्षा पनि लिनु पर्यो भनेर पढ्न सुरु गरेको हुँ,” एकनारायण भन्छन्, “पहिलो सेमेस्टर सकिन लाग्यो । अब तीन वर्ष छ ।” भोकलदेखि बाजा तथा रागसम्मको ज्ञान संगीतको अध्ययनमा सिकाइन्छ ।
यद्यपि, गायनभन्दा पनि समग्र संगीतको शिक्षाका लागि आफूले क्याम्पसमै भर्ना भएर अध्ययन सुरु गरेको उनको भनाइ छ । “राग मात्रै अध्ययन गर्यो भने त्यसमा आधारित भएर एकएक वटा गीत गायो भने धेरै हुन्छ,” उनी भन्छन् ।
संगीतको औपचारिक शिक्षासँगै सांगीतिक क्रिएसन पनि परिपक्व हुनेमा उनको विश्वास छ । “अहिले जति क्रिएसन गरियो त्यो कति नजानेरै वा अलिअलि जानेर गरियो होला । तर, औपचारिक शिक्षा लिएपछि परिपक्व क्रिएसन हुन्छ भन्ने मेरो विश्वास छ,” उनी भन्छन्, “सांगीतिक क्षेत्रमा आउन चाहने नयाँ पुस्तासँगको संगतले पनि अहिले ट्रेन्ड बुझ्न र धेरै कुरा सिक्ने मेरो अपेक्षा छ ।”
अध्ययनमा व्यस्त भएकै कारण अहिले आफूले रचनाको काम कम गरेको उनले जानकारी दिए । उनले नातिकाजी राष्ट्रिय सम्मान तथा पुरस्कार २०७८ पनि पाइसकेका छन् । नातिकाजी श्रेष्ठको ९८औँ जन्मजयन्तीका अवसरमा उनलाई ‘नातिकाजी राष्ट्रिय संगीत पुरस्कार’ दिने घोषणा गरिएको छ । माघ ७ गते उनले यो पुरस्कार पाउँदै छन् ।