काठमाडौं । नेपाली सिनेमा उद्योगलाई वास्तवमा केही सीमित ब्यानरले चलायमान बनाइरहेका छन् । वार्षिक १०० को हाराहारीमा सिनेमा निर्माण तथा प्रदर्शन हुन थालिसकेको उद्योगलाई चलायमान बनाउने ब्यानर मुस्किलले आधा दर्जन पनि छैनन् । त्यसमध्ये पनि सबै सिनेमा चल्दैनन् । केही कलाकार तथा निर्देशकका सिनेमा मात्र हुन्, जसका सिनेमा अक्सर नेपाली बजारमा रुचाइरहेको पाइन्छ ।
दीपाश्री निरौलाले निर्देशन गरेका सिनेमा हालसम्म राम्रो कमाइ गर्ने चलचित्र हुन् । ‘छक्का पञ्जा’ सिरिज उनले निर्देशन गर्दै आएकी छन् । ‘छक्का पञ्जा’का तीन सिरिज उनले निर्देशन गरिन् । भलै, अहिले छायांकनरत ‘छक्का पञ्जा–४’ हेमराज बिसीले निर्देशन गरिरहेका छन् । यो सिरिज नेपालको सर्वाधिक प्रतीक्षित सिरिज हो । यसलाई क्यूएफएक्सका सञ्चालकको अभिव्यक्तिले स्पष्ट पार्छ । नेपालकै ठूलो मल्टिप्लेक्स क्यूएफएक्स चेनका सञ्चालकमध्येका एक भाष्करराज ढुंगाना हालसम्म आफ्नो मल्टिप्लेक्समा ‘छक्का पञ्जा’को ग्रस कलेक्सनलाई कुनै पनि नेपाली चलचित्रले उछिन्न नसकेको बताउँछन् ।
‘छक्का पञ्जा’ सिरिज मात्र होइन, दीपकराज गिरी र दीपाश्री निरौला जोडिएका अधिकांश चलचित्रले उल्लेख्य व्यापार गरेका छन् । ‘छ माया छपक्कै’ र ‘शत्रुगते’ले पनि बक्सअफिसमा राम्रो कलेक्सन गरेका थिए । त्यसैले दीपक–दीपाका सिनेमालाई यस उद्योगलाई नै चलायमान बनाउने चलचित्र मानिन्छ ।
‘कबड्डी’ पनि नेपाली सिनेमा उद्योगमा रुचाइएको सिरिज हो । यसको पछिल्लो सिरिज ‘कबड्डी–४’ ले पनि ऐतिहासिक ग्रस कलेक्सन गरेको थियो । त्यसैले नेपाली दर्शकका लागि यो पनि प्रतीक्षित चलचित्र हो ।
रामबाबु गुरुङले निर्देशन गरेका चलचित्र पनि दर्शकको नजरमा पर्ने चलचित्र हुन् । उनको चलचित्र ‘फूलबारी’ आउँदो फागुन ५ गते रिलिज हुँदै छ । रामबाबुले निर्देशन गरे पनि यो चलचित्रले खासै हाइप बनाउन सकेको छैन । रामबाबुले निर्देशन गरेका सबै चलचित्रले भने उल्लेख्य व्यापार गरेका छैनन् ।
प्रदीप भट्टराईले निर्देशन गरेका सबै चलचित्रले नेपाली बक्सअफिसमा लोभलाग्दो कमाइ गरेका छन् । ‘जात्रा’, ‘शत्रुगते’, ‘जात्रैजात्रा’ र ‘महापुरुष’ उनले निर्देशन गरेका चलचित्र हुन् । यी चारै चलचित्रले राम्रो व्यापार गरेका छन् ।
निश्चल बस्नेतले निर्देशन गरेका दुई चलचित्र ‘लुट’ र ‘लुट–२’ पनि बक्सअफिसमा उल्लेख्य कमाइ गर्ने चलचित्र हुन् ।
झरना थापा निर्देशित चलचित्र ‘ए मेरो हजुर–२’ देखि यताका सिरिज पनि नेपाली बक्सअफिसमा राम्रो कमाइ गर्ने सिरिज हो ।
विकास आचार्यले निर्देशन गर्दै आएको चलचित्र ‘नाइँ नभन्नु ल’ पनि रुचाइएको चलचित्र सिरिज हो । यीबाहेक केही निर्देशकका चलचित्रले पनि नेपाली बक्सअफिसलाई चलायमान बनाउँदै आएका छन् ।
यो वर्ष करिब आधा दर्जन चलचित्र राम्रैसँग चलिसकेका छन् । चलचित्रको ठूलो संख्या भने लगानी डुबाउनेमै छन् । केही सिनेमा चले, तर त्योभन्दा ठूलो संख्यामा चलेनन् । यद्यपि, सिनेमा निर्माणको क्रम रोकिएको छैन । प्रदर्शनमा छिनाझपटी छँदै छ । एउटै डेटमा दुई वा त्योभन्दा ठूलो संख्यामा सिनेमा रिलिजको लाइनअपमा छन् ।
यसको पछिल्लो उदाहरणका लागि आउँदो फागुन १९ गतेलाई लिन सकिन्छ । फागुन १९ मा बक्सअफिसमा अपेक्षा गरेका दुई चलचित्र रिलिज हुने भएपछि क्यूएफएक्सले एकैदिन दुई ठूला ब्यानरका चलचित्र रिलिज नगर्ने जनाएको थियो । भलै, यो अडानमा क्यूएफएक्स अडिग रहन्छ वा रहँदैन, त्यो हेर्न बाँकी छ । तर, यो मितिमा आउने भनिएका दुई चलचित्रका वितरकले सोही दिनमा आफ्नो चलचित्र ल्याउने बताइसकेका छन् । र, सोहीअनुसार प्रचार पनि गरिरहेका छन् ।
नेपाली सिनेमा उद्योगलाई चलायमान बनाउने निकट भविष्यमा आउने सम्भावित चलचित्र कुन–कुन हुन् ? निर्माता तथा निर्देशकले आ–आफ्नै दाबी गरिरहे पनि ‘काष्ट’ र यसअघि निर्देशकले गरेको काम र त्यसप्रति दर्शकको झुकावलाई हेर्ने हो भने केही चलचित्रलाई प्रतीक्षित मान्न सकिन्छ । त्यसमध्ये केही सिनेमा छायांकन भइसकेका छन् । केही छायांकनको तयारीमा छन् । डेट भने लिइसकेका छन् ।
हालसम्म डेट लिइसकेका चलचित्रमा सबैभन्दा प्रतीक्षित चलचित्र ‘छक्का पञ्जा–४’ लाई लिन सकिन्छ । हेमराज बिसीले निर्देशन गरेको चलचित्रको मुख्य भूमिकामा दीपकराज गिरी, केदार घिमिरेलगायत दीपक–दीपाको टिम छ । अघिल्ला सिरिजप्रति दर्शकको उत्साहलाई हेर्दा यो यसले पनि उल्लेख्य साथ पाउने अपेक्षा निर्माण पक्षसँगै वितरक र प्रदर्शकको छ । यो चलचित्र फागुन १९ गते प्रदर्शन हुनेछ ।
फागुन १९ मै आउन लागेको चलचित्र ‘छड्के–२’ पनि प्रतीक्षित चलचित्रमध्यको एक हो । निगम श्रेष्ठ निर्देशित चलचित्र ‘छड्के–२’ अनमोल केसी रहेका कारण पनि अपेक्षित बनेको हो । ग्याङस्टरको नाइकेका रूपमा यो सिनेमामा देखिने अनमोल स्टारडम भएका नायक हुन् । अनमोललाई लिएर निर्माण गरिएका चलचित्रले सहजै लगानी उठाउने गरेको धेरै निर्माताहरूले बताउने गरेका छन् ।
‘छड्के’ लोभलाग्दो इनिसियल ग्रस कलेक्सन गरेको चलचित्र हो । तर, तेस्रो दिनदेखि भने त्यो चलचित्रले दर्शकको अभाव झेल्नुपरेको थियो ।
‘कबड्डी’का निर्देशक रामबाबु गुरुङले निर्देशन गरेका कारण ‘फूलबारी’ पनि धेरैले अपेक्षा गरेको चलचित्रमा पर्छ । यसको टिजरले भने राम्रो हाइप बनाउन सकेको छैन ।
छायांकनमा जाने तयारीमा रहेको चलचित्र ‘भस्मे डन’ आउँदो दसैँमा रिलिज हुने निर्माण पक्षले जनाएको छ । सफल चलचित्र ‘पशुपतिप्रसाद’को मुख्य कलाकारमध्येको एक भस्मे डनको कथामा आधारित भएर यो चलचित्र बनाउन लागिएको हो । विपीन कार्की र सौगात मल्ल यसको मुख्य भूमिकामा हुनेछन् । भस्मे डन नेपाली सिनेमाका शुभेच्छुकमाझ लोकप्रिय पात्र हो । यही क्यारेक्टरबाट विपीन लोकप्रिय भएका थिए ।
‘नाइँ नभन्नु ल–६’ पनि राम्रो हाइप बटुल्न सफल हुने चलचित्र हो । यसका केही सिरिज लोकप्रिय भएकाले यसले पनि दर्शकको ध्यान तान्न सक्छ । नेपाली सिनेमा उद्योगमा सबैभन्दा धेरै सिरिज आउने यो पहिलो चलचित्र हो । सिनेमा लेखक तथा निर्देशक विकास आचार्यले ‘नाइँ नभन्नु ल–६’ निर्देशन गर्दै छन् ।
निर्देशक प्रदीप भट्टराईको टिम अहिले स्क्रिप्ट लेखनमा लागेको छ । प्रदीपले ‘महाजात्रा’को स्क्रिप्ट लेखिरहेका छन् । उनको यो चलचित्र कहिले आउँछ निश्चित छैन । यो सिनेमा पनि उनको ‘ट्रयाक रेकर्ड’ तथा ‘जात्रा’ र ‘जात्रैजात्रा’का कारण अपेक्षित बन्ने निश्चित छ । प्रदीपले यसअघि निर्देशन गरेका चारै चलचित्रले ५१ दिन मनाएका थिए ।