काठमाडौं । अघिल्ला वर्षहरूको तुलनामा यो साल नेपाली चलचित्र तुलनात्मक रूपमा केही सफल भए । यो वर्ष तुलनात्मक रूपमा संख्यात्मक हिसाबले लगानी उठाउने चलचित्रको संख्या धेरै रह्यो । यद्यपि, यो अघिल्ला वर्षसँगको तुलना गर्दा मात्र हो । समग्रमा लगानी गुमाउने चलचित्रको संख्या नै धेरै छ ।
‘कबड्डी–४’ बाट नेपाली चलचित्रले लगानी उठाउन सुरु गरेको थियो । त्यसपछि केही चलचित्रले राम्रो व्यापार गरे । बक्सअफिसमा ‘कबड्डी–४’ ले अनपेक्षित ग्रस कलेक्सन गर्यो । ‘कबड्डी’ सिरिजप्रति दर्शकको आकर्षण देखिएपछि ‘कबड्डी–४’ लाई ‘फाइनल म्याच’ अर्थात् अन्तिम सिरिज भनेर प्रचार गरिएको थियो । तर, निर्माण पक्ष यसको अर्को सिरिज ‘कबड्डी–५’ बनाउने निर्णयमा पुगिसकेको छ ।
यही वर्ष ‘प्रेम गीत–३’, ‘दुई नम्बरी’, ‘के घर के डेरा’, ‘झिँगे दाउ’ले लगानी उठाए । यसपछि रिलिज भएको चलचित्र ‘महापुरुष’ले पनि बक्सअफिसमा राम्रो ग्रस कलेक्सन गर्यो । यो चलचित्रले ११ करोड रुपैयाँभन्दा माथि ग्रस कलेक्सन गरिसकेको छ ।
यसबीचमा थुप्रै चलचित्र रिलिज भए । केहीको राम्रै हाइप पनि थियो । तर, राम्रो हाइप बनाएका चलचित्र पनि चलेनन् । यसको पछिल्लो उदाहरणका रूपमा ‘डिसेम्बर फल्स’लाई लिन सकिन्छ । आर्यन सिक्देल करिब साढे तीन वर्षपछि सिनेमामा देखिएका थिए । तर, यो चलचित्रले पनि दर्शक तान्न सकेन । सिनेमा घाटामा गयो ।
गएको शुक्रबार हरर जानराको चलचित्र ‘चि मुसी चि’ रिलिज भयो । प्रियंका कार्की, ऋचा शर्मा, बेनिशा हमाल मुख्य भूमिकामा रहेको यो चलचित्रले पनि दर्शकको मन जित्न सकेन । ऋचाले यो चलचित्र यसअघिको आफ्नो चलचित्र ‘सुनकेसरी’को ‘भर्पाइ’ भन्दै प्रचार गरेकी थिइन् ।
नेपाली हरर चलचित्रले अक्सर साउन्डमा मार खाने गरेको भन्दै प्रियंकाले ‘चि मुसी चि’को साउन्डले नै दर्शक तर्साउने बताउँदै आएकी थिइन् । तर, उनीहरूले गरेको दाबीमा दर्शकले विश्वास गरेनन् । दर्शक सिनेमा हेर्न हल गएनन् । त्यसो त जस्तोसुकै सिनेमा होस्, राम्रो भन्ने नेपाली कलाकारको बानी रहेकाले दर्शकले उनीहरूको भनाइमा विश्वास गर्न छाडिसकेका छन् ।
‘पैँचो तिर्ने’ परम्पराजस्तै बनिसकेको र यसबाट धोका पाइसकेका दर्शक अब कुनै कलाकारले चलचित्र राम्रो भनेर दाबी गरेकै भरमा हलसम्म जाने अवस्था नरहेको नवीन सुब्बाले बताउने गरेका छन् ।
बलिउडको यो संस्कृति नेपाली कलाकारले पनि पछ्याइरहेको र यो दर्शकका लागि धोका भएको उनी बताउँछन् । समग्रमा यो प्रवृत्तिले चलचित्र उद्योगलाई नै नोक्सान गर्ने उनको भनाइ छ । मेकरले सच्चिने अवसर नै नपाउने उनको तर्क छ ।
यसबीचमा थुप्रै नेपाली चलचित्र रिलिज भए । ‘हिजो आजका कुरा’, ‘डेसान’, ‘सोल अफ द कमाण्डो’, ‘मिलन’, ‘लक्का जवान’, ‘पासो’ आदि । तर, धेरैलाई यी चलचित्र कहिले आए कहिले गए पत्तै भएन । केहीले राम्रै पब्लिसिटी गरे पनि सफल भएनन् । केही भने बिनाप्रचार रिलिज भएका थिए ।
यही वर्ष रिलिज भएर औसत समीक्षा बटुलेका केही चलचित्र पनि खासै चलेनन् । ‘राधा’, ‘दोख’, ‘पानी फोटो’, ‘प्रकाश’, ‘चिसो मान्छे’, ‘ऐना झ्यालको पुतली’मध्ये केहीले औसत त केहीले राम्रो समीक्षा बटुले । यी सिनेमाले पनि अपेक्षित दर्शक बटुल्न सकेनन् ।
अघिल्ला वर्षहरूमा मुस्किले पाँच प्रतिशत चलचित्रले मात्र लगानी उठाउँथे । यो वर्ष लगानी उठाउने सिनेमाको संख्या प्रतिशतमा केही बढ्ने देखिए पनि अधिकांशले लगानी डुबाउने निश्चित प्रायः छ ।
केही चलचित्र प्रदर्शनको लाइनअपमा छन् । यही महिना रिलिज हुने केही चलचित्रले पनि राम्रै हाइप बनाएका छन् । पुस २९ गते रिलिज हुने ‘तिम्रो मेरो साथ’ र माघ २० गते रिलिज हुने ‘ह्यारी कि प्यारी’, फागुन ५ गते रिलिज हुने भनिएका कबड्डी फेम्ड निर्देशक रामबाबु गुरुङ निर्देशित ‘फूलबारी’लगायत केही चलचित्रले राम्रै हाइप बनाइरहेका छन् । तर, हाइप बनाएक सबै चलचित्र चल्दैनन् भन्ने यसअघि नै प्रस्ट भइसकेको छ ।
हेमराज बिसीले निर्देशन गरिरहेको दीपकराज गिरी र दीपाश्री निरौलाको चलचित्र ‘छक्का पञ्जा–४’ र निगम श्रेष्ठ निर्देशित ‘छड्के–२’ पनि राम्रो हाइप बनाएका चलचित्र हुन् । तर, यी चलचित्रको बक्सअफिसमा ग्रस कलेक्सन कस्तो गर्नेछन् अहिले नै भन्न सकिने अवस्था छैन ।
