काठमाडौं । नेपाली कथानक चलचित्र ‘भस्मे डन’ फागुन १२ गतेबाट छायांकन हुँदै छ । चलचित्र ‘पशुपतिप्रसाद’को मुख्य कलाकार मध्येको एक चरित्र भस्मे डनको कथामा चलचित्र निर्माण हुन लागेको हो ।
चलचित्रमा ‘पशुपतिप्रसाद’को भस्मे डन अर्थात विपीन कार्की नै मुख्य कलाकारको रूपमा अनुबन्ध भइसकेका छन् । सौगात मल्लसँग लिखित सम्झौता नभए पनि मौखिक सहमति भइसकेको निर्देशक दीपेन्द्र के खनालले जानकारी दिए । सौगात सिनेमामा एन्टागोनिष्टको भूमिकामा हुनेछन् ।
अन्य कलाकारमा प्रकाश घिमिरे, रविन्द्र सिंह बानियाँ फाइनल भइसकेका छन् । हिरोइनमा भने अहिलेसम्म निश्चित नभइसकेको निर्देशक खनालले जानकारी दिए । ‘पशुपतिप्रसाद’का मुख्य कलाकार अर्थात पशुपति यो चलचित्रमा रहने छन् वा छैनन् भन्ने प्रश्नमा निर्देशक खनाल भन्छन्, “उहाँको रोल यो चलचित्रमा अहिलेसम्म छैन । यद्यपि, स्क्रिप्ट रिराइटकै चरणमा छ ।”
‘पशुपतिप्रसाद’मा पशुपति मरेपछि सिनेमा सकिएको थियो ।
‘पशुपतिप्रसाद’मा विपीनले गरेको क्यारेक्टर लोकप्रिय भएको थियो । सोही भूमिकाबाट नेपाली रजतपटमा विपीनको उदय भएको थियो । अहिले उनी कमिर्सयल हुन् अथवा क्रिएटिभ दुवै फिल्मका रोजाइका अभिनेता हुन् ।
दीपेन्द्र के खनालले निर्देशन गर्ने चलचित्रको कथा खगेन्द्र लामिछानेले लेखेका छन् । निर्माता पनि खगेन्द्र स्वयं हुन् ।
फागुन १२ गतेबाट छायांकनमा जाने चलचित्र पशुपतिनाथको मन्दिर वरपर छायांकन हुनेछ । चलचित्र आउँदो दसैंमा रिलिज हुनेछ ।