काठमाडौं । अधिकांश नयाँ कलाकारसहित हास्य कलाकार जितु नेपालले ‘मुन्द्रेको कमेडी क्लब’ प्रसारणको तयारी गरेका छन् । माघको पहिलो हप्ताबाट कार्यक्रम प्रशारण हुनेछ ।
‘मुन्द्रेको कमेडी क्लब’मा कलाकारसहित अध्यक्ष पनि परिवर्तन हुनेछ । सुरुआती दिनमा अध्यक्ष रहेकी दीपाश्री निरौला र दोस्रो चरणमा अध्यक्षता गरेकी करिष्मा मानन्धर दुवै यो पटक हुने छैनन् ।
‘मुन्द्रेको कमेडी क्लब’मा यो पटक दमन रुपाखेती, राजेन्द्र नेपाली ‘लट्टे’, श्याम राना, दिनेश काफ्ले, प्रभात लामा र एलिना बास्कोटा समेटिएका छन् ।
श्याम राना महिलाको भेषमा देखिने जितुले स्पष्ट पारे । कार्यक्रमलाई दिनेश डिसीले निर्देशन गर्नेछन् । पुरानोभन्दा केही फरक रूपमा कार्यक्रम आउने उनले जानकारी दिए ।
‘मुन्द्रेको कमेडी क्लब’ले यसपटक गीत पनि तयार पारेको छ । गीतको बुधबार छायांकन गरिएको छ । “अहिले सेट डिजाइनको काम भइरहेको छ । सेट डिजाइनको काम सकिएपछि छायांकन सुरु हुनेछ,” जितुले भने । कुन टेलिभिजनबाट प्रसारण हुने त्यो भने निर्णय भइनसकेको उनले जानकारी दिए ।
