काठमाडौं । नेपाली पस्मिना हलिउड नायिकाले लगाएको पाइएको छ । नेपाली पस्मिना फ्याक्ट्रीले उत्पादन गरेको पस्मिना हलिउड नायिका एलिजावेथ हर्लीले लगाएकी हुन् ।
एलिजावेथ सन् १९९० देखि २००० सम्मकी चर्चित नायिका हुन् । उनका थुप्रै चलचित्र लोकप्रिय छन् । रमेश अधिकारीको रीता इन्डस्ट्रिजले काठमाडौंमा उत्पादन गरेर अमेरिका निर्यात गरेको पस्मिनाको सल एलिजावेथले पहिरिने गरेकी हुन् ।
“मेरो अमेरिकन क्लाइन्टले केही वर्ष अगाडि पनि विभिन्न सेलिब्रिटीले तिम्रोबाट ल्याएको पस्मिना लगाएका छन् भन्थ्यो । अहिले फेरि एक महिना अगाडि एलिजावेथको इन्स्टाको लिन्क नै पठाइदियो, जहाँ मेरो कम्पनीको पस्मिना उसले लगाएको देखिन्छ,” रमेश भन्छन्, “हामीले आफ्नै सामानको ब्रान्डिङ गर्न सकिरहेका छैनौँ । तर, हामीले हाम्रो देशको उत्पादन हो भनेर विश्वभर ब्रान्डिङ गर्न सक्ने हो भने व्यक्तिसँगै देशलाई नै फाइदा हुने थियो ।”
करिब तीन दशकदेखि रमेशले काठमाडौंमा पस्मिना फ्याक्ट्री सञ्चालन गर्दै आएका छन् । उनले काठमाडौंमा उत्पादन गरेको पस्मिना अमेरिकासँगै युरोपका विभिन्न देशमा निर्यात गर्दै आएका छन् । पस्मिनासँगै रमेशले गलबन्दी, स्वेटर, टोपी, पञ्जालगायत पहिरन उत्पादन गर्दै आएका छन् । यसका अलावा उनको फ्याक्ट्रीले गलैँचा समेत उत्पादन गर्छ ।
नेपालमा कम्तीमा आठ हजार रुपैयाँदेखि पाइने पस्मिनाको एउटा सल अमेरिका तथा युरोपमा पुग्दा कम्पनीको लेवलअनुसार मूल्य निर्धारण हुन्छ । ब्रान्डेड कम्पनीले लेवल लगाए मूल्य उच्च हुन्छ । सामान्य कम्पनीले लेवल लगाए मूल्य केही कम हुन्छ । न्यूनतम मूल्य पनि ३० हजारमाथि हुने गरेको उनी बताउँछन् ।
“हामीले हाम्रो लोगो विश्वभर चलाउन सके राम्रो मूल्य पाउन सकिन्थ्यो । तर, नेपाली ब्रान्ड वर्ल्र्डवाइड ब्रान्डेड नभएकाले मूल्य पाउन सकेको छैन,” रीता इन्ड्रस्टिजका सञ्चालक समेत रहेका रमेश भन्छन्, “मेरो फ्याक्ट्रीबाट करिब २० वटा क्लाइन्टले अमेरिका र युरोप पस्मिना लैजान्छन् ।” अमेरिकाभन्दा पनि युरोप आफ्नो पस्मिनाको मुख्य बजार रहेको उनी बताउँछन् ।
वार्षिक १० करोडसम्मको पस्मिना निर्यात गर्ने गरेको र रीता इन्डस्ट्रिजका पस्मिना र गलैँचा उद्योगमा ६०० जनासम्मलाई रोजगारी दिइएको उनको भनाइ छ ।
आफ्नो फ्याक्ट्रीमा रीता इन्डस्ट्रीका चेयरमेन रमेश अधिकारी ।
कोभिड–१९ को प्रभावका कारण अहिले भने सो संख्यामा केही कटौती गरिएको उनी बताउँछन् । “तर, विस्तारै रिकभर हुँदै छ । चाँडै नै हामी पहिलाकै अवस्थामा फर्कने कोसिसमा छौँ ।”
नेपालमा कतिपयले पस्मिना भनेर धागो मिसाएर बेचिरहेको उनको गुनासो छ । यसलाई ‘कन्ट्रोल’ गर्ने संयन्त्र आवश्यक रहेकोमा उनको जोड छ ।
“हाम्रोमा धेरैले पियोर पस्मिना भनेर त्यसको मूल्यमा धागो मिसाएर बेचिरहेका छन् । शुद्ध पस्मिना हो÷होइन भनेर छुट्ट्याउन सरकारले ल्याबमा टेस्ट गर्नुपर्छ,” रमेश भन्छन्, “हाम्रो पस्मिना बिनापब्लिसिटी हलिउडका सेलिब्रिटीले लगाइरहेका छन् । पब्लिसिटी गर्यो भने यसको बजार थप विस्तार गर्न सकिन्छ ।”
नेपालमा डलर भित्र्याउने राम्रो माध्यम पस्मिना हुन सक्ने भन्दै उनी यसमा राज्यको ध्यान खिचिनुपर्नेमा जोड दिन्छन् ।
बेलायती अभिनेत्री तथा मोडल हर्ली चलचित्रमा निभाएको आफ्नो भूमिका र फेसनका कारण सधैँ चर्चामा रहन्छिन् । उनले सन् १९९२ मा ठूलो लगानीको चलचित्र ‘प्यासेन्जर ५७’ मा अभिनय गरेकी थिइन् । हर्लीले टेलिभिजनमा ‘द रोयल्स’ सिरिजमा समेत काम गरेकी छन् ।
सन् १९९४ मा भर्साक्चे गाउनमा सुनको सेफ्टी पिन लगाएर फिल्म प्रिमियरमा जाँदा उनी मिडियामा छाएकी थिइन् । उनको सो पहिरनबारे अझै पनि चर्चा हुने गर्छ । फेसन मन पराउने हर्ली नेपालमा बनेको पस्मिना सलको पनि उत्तिकै सौखिन हुन् ।