काठमाडौं । हेम–सरिता पाठक फाउन्डेसनले घोषणा गरेअनुसार विभिन्न सर्जकहरूलाई पुरस्कृत गरेको छ ।
काठमाडौंमा आयोजित कार्यक्रममा फाउन्डेसनले पत्रकार जीवराम भण्डारीलाई ‘टंकप्रसाद–रमादेवी पाठक पत्रकारिता पुरस्कार’ प्रदान गरेको छ । हास्यकलाकार हरिवंश आचार्यले दुई हजार अमेरिकी डलर राशिको उक्त पुरस्कार प्रदान गरे ।
यस्तै, गायक नवीन पौडेललाई एक हजार अमेरिकी डलर राशिको ‘हेम–सरिता पाठक अन्तर्राष्ट्रिय संगीत पुरस्कार’ तथा कवि मनोज विश्वकर्मालाई एक हजार अमेरिकी डलर राशिकै ‘भ्रष्टाचारविरुद्धको अन्तर्राष्ट्रिय कविता पुरस्कार’ प्रदान गरिएको छ । कार्यक्रममा २५ उत्कृष्ट कविलाई प्रमाणपत्र प्रदान गरिएको थियो ।
सोही अवसरमा फाउन्डेसनले प्रकाशित गरेको ‘भ्रष्टाचारविरुद्धका कविता’ पुस्तक लोकार्पण गरियो । पुस्तक हेम–सरिता पाठक फाउन्डेसन नेपाल शाखाका अध्यक्ष राधेश्याम लेकालीले सम्पादन गरेका हुन् ।