काठमाडौं । नेपाल स्रष्टा समाजको १६ औँ स्थापना दिवसका अवसरमा दुई लोकप्रिय कविहरूलाई सम्मान गरिने भएको छ । स्रष्टा समाजका अनुसार चर्चित कवि तथा समाजका संस्थापक अध्यक्ष शैलेन्द्र साकारलाई सम्मान गर्न लागिएको हो ।
त्यस्तै, ०७९ सालको ‘प्रसिद्ध कँडेल युवा स्रष्टा सम्मान’ कवि नवराज पराजुलीलाई प्रदान गरिने भएको छ । ४० वर्षभन्दा कम उमेरका स्रष्टालाई प्रदान गरिने उक्त सम्मानका साथ नगद राशि ११ हजार १११ रुपैयाँ प्रदान गरिने पनि जनाइएको छ ।
साहित्यकार चेतनाथ कँडेल ‘हरित’ र सीता कँडेलले आफ्ना छोराको स्मृतिमा स्थापना गरेको यस सम्मानबाट साहित्यकारहरू रमेश शुभेच्छु, अनुपम रोशी, महेश पौडेल र मिलन समीर सम्मानित भइसकेका छन् ।
नेपाल स्रष्टा समाजका अध्यक्ष श्रीओम श्रेष्ठ ‘रोदन’को अध्यक्षतामा हालै बसेको बैठकले उक्त निर्णय गरेको महासचिव देवीका तिमिल्सिनाले जानकारी गराए ।