१
जून पनि हरायो अचेल तातो घाम पनि हरायो
नैतिकतामा लगाएको त्यो लगाम पनि हरायो
इज्जत, इमान सबथोक हरायो बेइमानी सहरमा
अचम्म ! बेइमानी सहरमा बदनाम पनि हरायो !!
२
बादलको अघिपछि घाम रोयो अनि जून रोयो
साजहरूअगाडि बेमौसमी सारंगीको धुन रोयो
सम्पन्न नै होस् तर मानव रुनलाई अछुतो छैन
बेइमानीको नजर पर्दा इमानको बिस्कुन रोयो ।
३
खेतका गरा भिजाउनुपर्छ पानीले कुलोमा सुक्नु हुन्न
अन्यायविरुद्ध लड्नेहरू अर्थको तुलोमा झुक्नु हुन्न
विसंगतिको तुलोमा निष्ठा जोख्नेविरुद्धको संघर्षमा
आइपर्ने चुनौतीको सामना गर्नुपर्छ, दुलोमा लुक्नु हुन्न ।
४
सुकिलोमुकिलो मान्छे फोहोर पोखरीमा पस्दै छन्
नयाँ जोगीझैँ फुस्रै पारेर जीउमा खरानी घस्दै छन्
साथ दिने कोही हुन्नन् समस्या परेको बेलामा साथी
हेर्नुस् ! इजार तपाईंको अरूले पो कम्मर कस्दै छन् !!
५
वागमा रंगीन फूल आकाशमा तारा जून हुन्छ
मनको सुकुलमा पीर–व्यथाको बिस्कुन हुन्छ
वेदना मनमै लुकाएर हाँस्न खोज्दा खोज्दै पनि
पीडाको खहरे उर्लन्छ आँखामा मनसुन हुन्छ ।।
(फुटुङ, काठमाडौं)