काठमाडौं । विवाहको लामो समयसम्म पनि सन्तान नभएपछि सर्लाहीको बलराका ४५ वर्षीय विनोदकुमार झाको दैनिकी तनावपूर्ण थियो । ३८ वर्षीया श्रीमती रेखादेवी झालाई लिएर उनी उपचारका लागि धेरै ठाउँ भौँतारिए । आफूले थाहा पाएका, अरूले सुझाएका सबै ठाउँमा पुग्दा र धेरैखाले उपाय लगाउँदा समेत सन्तान भएन ।

अन्ततः झा दम्पतीलाई कोही व्यक्तिले आईभीएफ पद्धतिका बारेमा सुनाए । नर्भिक आईभीएफ सेन्टरमा टेस्टट्युब बेबी प्रविधिबाट सन्तान प्राप्तिका लागि उनीहरूले गरेको प्रयास पहिलोपटकमै सफल भयो । केही दिनअघि मात्र सेन्टरमा रेखादेवीले तीन सन्तानलाई जन्म दिइन् ।

“मेरो जीवन र परिवारमा उज्यालो छाएको छ । हामी औधी खुसी छौँ,” तिम्ल्याहा सन्तान भएपछि विनोदले भने, “लामो समयदेखि सन्तान नहुँदाको पीडा अन्त्य भएको छ । अब मेरो परिवार पूर्ण भएको छ ।”

नर्भिक अस्पतालमा शल्यक्रियमार्फत प्रसूति गराइएकी रेखा र उनका तीन शिशुकै अवस्था सामान्य छ । एक–दुई दिनभित्रै डिस्चार्ज गर्ने तयारी रहेको अस्पतालकी वरिष्ठ स्त्रीरोग एवं टेस्टट्युब बेबी विशेषज्ञ डा. नूतन शर्माले बताइन् ।