काठमाडौं । अभिनेता विपीन कार्कीले आफू अनुकूल समय नभए हिन्दी सिनेमा ‘एनिमल’ नखेल्ने भएका छन् । लामो समय ‘एनिमल’का लागि होल्ड भएर बस्दा धेरै काम छोड्नु परेको स्मरण गर्दै विपीनले अब समय मिलेको खण्डमा मात्रै उक्त सिनेमा (एनिमल)मा काम गर्ने स्पष्ट पारे ।
“मैले एनिमलको निर्माण टिमलाई यसपटक स्पष्ट भनेर आएको छु । अब म तपार्ईंहरूले आइज भनेको समयमा आउन सक्तिनँ । एक वर्ष सबै काम छोडेर तपाईंहरूको सिनेमा भनेर बसेँ । तर, अब अझै यसरी पर्खिन सक्तिन,” विपीन बाह्रखरीसँग भन्छन्, “मलाई अब कम्तीमा एकडेढ महिना अगाडि खबर गरे मात्रै काम गर्न सक्छु होइन भने क्यान्सिल गर्छु । नेपाली सिनेमाको काम छोडेर आउन सम्भव हुँदैन भनेर आएको छु ।”
बलिउड सिनेमा नखेल्ने अवस्थामा पुग्नु भएको हो ? भन्ने प्रश्नमा विपीन स्पष्ट पार्छन्, “अब उनीहरूले यो दिन आइज भनेको अवस्थामा म यहाँ काम गरिरहेको समय रहेछ भने जान्नँ । एक/डेढ महिनाको समय दिएर मेरो सेड्युल राखेर बोलाए भने जान्छु ।”
एक वर्षदेखि ‘एनिमल’को गेटअपमा बस्दा यहाँ धेरै सिनेमाको काम पर सार्नु परेको र अब त्यो सम्भाव नहुने उनले स्पष्ट पारे । एक वर्षको अवधीमा आफू ६ पटक मुम्बइ गएको तर सेड्युल पछि सर्यो भन्दै केही समयपछि बोलाउँछौँ भन्ने गरेको भन्दै विपीन यसले आफ्नो करिअरको पिक समयको एक वर्ष लस भएको बताउँछन् ।
“लिखित एग्रिमेन्ट छैन । यो दिनबाट सुट भन्ने फिक्स छैन । खबर गर्छौं भनेर मात्रै हुँदैन,” विपीन अगाडि थप्छन्, “ठूलो सिनेमा उद्योग हो, अवसर राम्रो हो भनेर पर्खिएँ । तर, अब एनिमल भनेर मैले मलाइ यो उचाइ दिने सिनेमा उद्योगलाई बिर्सिन हुँदैन ।”
यही मंसिर २६ गतेबाट उनी ‘प्रसाद–२’को छायांकनमा जाँदै छन् । अन्य पेन्डिङका काम पनि अब लगातार गर्ने उनले बताए । यो बीचमा आफूले काम गरेको ‘फूलबारी’ एनिमलका लागि जान तयार रहेको समय चोरेर गरेको उनी स्पष्ट पार्छन् ।
‘अर्जुन रेड्डी’को हिन्दी भर्सन ‘कबिर सिंह’को निर्देशन गरेका सन्दिप रेड्डी भांगाले निर्देशन गरिरहेको चलचित्र ‘एनिमल’ खहिले छायांकन भइरहेको छ । ‘एनिमल’मा रनवीर कपुर, अनिल कपुर, बबी देओल र परिनीति चोपडाले अभिनय गरिरहेका छन् ।