न्यूयोर्क । विश्व प्रसिद्ध टाइम पत्रिकाले युक्रेनका राष्ट्रपति एवं युक्रेनी साहसलाई सन् २०२२ वर्ष व्यक्तिको घोषणा गरेको छ ।
राष्ट्रपति भ्लोदिमिर जेलेन्स्कीले झन्डै एक वर्षदेखि रुसी फौजको आक्रमण झेल्दै आएका छन् ।
गत २४ फेब्रुअरीमा रुसले युक्रेनविरुद्ध औपचारिक युद्ध घोषणा गर्दा जेलेन्स्कीले आफू राजधानी किभमै बसेर मुलुकका लागि लड्ने निर्णय गरेका थिए । उनको कार्यको प्रशंसा गर्दै टाइम पत्रिकाका प्रधान सम्पादक एडवार्ड फेल्सेन्थलले यस वर्षको निर्णय स्मरणमा सबैभन्दा स्पष्ट रहको बताएका छन् ।
आफ्ना युद्ध पीडित जनतालाई उत्प्रेरित गर्न जेलेन्स्कीले दिनहुँ भाषण दिने गरेका छन् भने उनी युद्धका अग्रमोर्चामा पनि नियमित रूपमा देखिँदै आएका छन् । हालै मात्र उनले युक्रेनी फौजले रुसी फौजलाई धपाएर पठाएको दक्षिणी सहर खेर्सोनमा आयोजित सडक महोत्सवमा पनि सहभागिता जनाएका थिए ।
जेलेन्स्कीलाई वर्ष पुरुष उपाधि विजेता घोषणा गर्ने क्रममा प्रधान सम्पादक फेल्सेन्थलले भनेका छन्, “उनको सूचनाको आक्रमकताले भूराजनीतिक मौसम प्रणालीलाई परिवर्तन गर्दै विश्वभरि फैलिने कार्य लहर पैदा ग¥यो । युक्रेनी युद्धले जोसुकैमा चाहे सन्त्रास वा आशा पैदा गरोस् तर, जेलेन्स्कीले विश्वलाई यसरी हल्लाएको जस्तो घटना हामीले दशकौँदेखि देखेका छैनौँ ।”
जेलेन्स्कीलाई टाइमले ‘युक्रेनको साहस’ उपाधिले सम्मानित गर्ने भएको छ । मुलुकको रक्षाका लागि दिनरात खट्ने विभिन्न पेसाका युक्रेनी जनतालाई प्रतिनिधित्व गर्दै युक्रेनको साहसको संज्ञा दिइएको बताइएको छ ।
टाइमले पहिलोपटक सन् १९२७ मा ‘वर्ष व्यक्ति’ पुरस्कार दिन सुरु गरेको हो । गतवर्ष टेस्ला तथा स्पेसएक्सका प्रमुख तथा विश्वका सर्वाधिक धनी अर्बपति एलोन मस्कलाई यस उपाधिबाट सम्मानित गरिएको थियो । लाइभमिन्टबाट