काठमाडौं । चार अन्डर ६४ स्कोर गरेका रवि खड्काले समग्रमा १०–अन्डर १२६ स्कोर गर्दै सूर्य नेपाल काठमाडौं ओपन गल्फ प्रतियोगिताको दोस्रो दिन पनि अग्रता बनाउन सफल भएका छन् ।
नयाँ सिजनको पहिलो प्रतियोगिता सूर्य नेपाल काठमाडौं ओपनमा रविले पहिलो दिन ६–अन्डर ६२ स्कोर गरेका थिए । ३६ होलको समाप्तीमा रविले भुवन नगरकोटीलाई एक स्ट्रोकले पछि परेका छन् ।
रोयल नेपाल गल्फ क्लबमा जारी प्रतियोगिताको दोस्रो दिन रविले उत्कृष्ट प्रदर्शनलाई निरन्तरता दिनेक्रममा पहिलो, तेस्रो, चौँथो र छैटौँ होलमा बर्डी प्रहार गरे । नवौँ होलमा एक सट खेर फालेका रविले फ्रन्ट नाइन ३–अन्डर ३१ को स्कोरमा सके । १४औँ र १७औँ होलमा एक–एक सट बचाए पनि १६औँ होलमा बोगी खेलेपछि रविले ब्याक नाइन १–अन्डर ३३ को स्कोरमा सकाएका थिए ।
दोस्रो स्थानमा रहन सफल भुवनले पनि दोस्रो दिन ४–अन्डर ६४ कार्ड बनाउँदा समग्रमा ९–अन्डर १२७ को स्कोर बनाउन सफल भएका छन् । भुवनले पहिलो दिन ५–अन्डर ६३ स्कोर गरेका थिए । भुवनले दोस्रो दिन फ्रन्ट नाइनमा ३–अन्डर ३१ स्कोर गरे । उनले दोस्रो, चौँथो र पाँचौँ होलमा बर्डी प्रहार गरे । त्यसपछि १५औँ होलमा बर्डी खेलेका भुवनले ब्याक नाइन १–अन्डर ३३ को स्कोरमा सकाएका थिए ।
दोस्रो दिन पनि १–अन्डर ६७ अंक बनाएका रमेश अधिकारीले समग्रमा २–अन्डर १३४ स्कोर गर्दै तेस्रो स्थानमा उक्लिन सफल भएका छन् । रमेशले पहिलो दिन पनि १–अन्डर ६७ अंक स्कोर गरेका थिए । रमेशले १–अन्डर ६७ को नतिजा निकाल्ने क्रममा फ्रन्ट नाइन १–अन्डर ३३ को स्कोरमा पुरा गरे । रमेशले पहिलो, तेस्रो, चौथो र नवौँ होलमा बर्डी प्रहार गर्दा सातौ होलमा बोगी र पाँचौ होलमा डबल बोगी खेल्न पुगे । रमेशले ब्याक नाइन इभन–पार ३४ मा सकाए । रमेशले ११औँ र १३औँ होलमा एक–एक सट बचाए पनि १५औँ र १७औँ होलमा एक–एक सट खेर फालेका थिए ।
प्रोफेसनल गल्फ टुर अफ इन्डिया (पीजीटीआई) खेलिरहेका नेपालका नम्बर वान शुक्रबहादुर राई, प्रदीपकुमार लामा र राजेन्द्र श्रेष्ठ प्रधानले समग्रमा इभन–पार १३६ को स्कोर गर्दै संयुक्तरूपमा चौँथो स्थानमा छन् ।
उपाधि दाबेदार मानिएका शुक्रले खराब प्रदर्शन गर्ने क्रममा दोस्रो दिन ३–ओभर ७१ को स्कोर गरे । शुक्रले पहिलो दिन ३–६५ को स्कोर गरेका थिए । प्रदीप र राजेन्द्रले दोस्रो दिन समान २–अन्डर ६६ को स्कोर कार्ड तयार पारेका थिए । प्रदीप र राजेन्द्र दुबैले अघिल्लो दिन २–ओभर ७० स्कोर गरेका थिए ।
समग्रमा १–ओभर १३७ स्कोर गरेका कृष्णमान राजबाहक सातौँ स्थान छन् । समान २–ओभर १३८ को को स्कोर गरेका सूर्यप्रसाद शर्मा र जयराम श्रेष्ठ संयुक्तरूपमा आठौँ स्थानमा छन् ।
एमेच्योरतर्फ अजित बिके समग्रमा ६–ओभर १४२ को स्कोरसहित शीर्षस्थानमा कायमै छन् । उनले आज ४–ओभर ७२ मा खेल सकाएका थिए । दोस्रो स्थानमा रहन सफल सुरेश तामाङ र तेस्रो स्थानका प्रज्जवल गुरुङ अजित भन्दा १७ स्ट्रोकले पछि छन् ।
दोस्रो दिन ३६ होलको खेल सकिँदा १५–ओभर १५१ सम्म स्कोर बनाउने २१ प्रोफेसनल खेलाडीले कट बनाएका छन् । एमेच्योरतर्फ भने चार खेलाडीले कट बनाउँदा कुल २५ खेलाडी अन्तिम दुई चरणको खेलको लागि छनौट भएका छन् । प्रतियोगितामा ३१ प्रोफेशनल र ५ एमेच्योर खेलाडीले प्रतिस्पर्धा गरेका थिए ।
कूल ६ लाख ७० हजार पुरस्कार रकम रहेको प्रतियोगिताको विजेताले एक लाख १६ हजार रूपैयाँ नगद प्राप्त गर्नेछन् । उपविजेता खेलाडीले ७४ हजार तथा तेस्रो हुनेले ६३ हजार रूपैयाँ प्राप्त गर्नेछन् । त्यस्तै, उत्कृष्ट २१ भित्र पर्न सफल सबै प्रोफेसनल खेलाडीले नगद पुरस्कार प्राप्त गर्नेछन् ।
तस्बिरहरू : हरिशजंग क्षेत्री/बाह्रखरी