काठमाडौं । मिचेल भान लिगेनको शतकप्रेरित नामिबियाले बुधबार आईसीसी विश्वकप क्रिकेट लिग–२ अन्तर्गत त्रिदेशीय शृंखलामा नेपालसामु २७६ रनको लक्ष्य प्रस्तुत गरेको छ ।
भान लिगेनले ११९ रन बनाएपछि टस हारेर ब्याटिङमा निम्त्याइएको नामिबियाले निर्धारित ५० ओभरमा सात विकेट गुमाएर २७५ रनको योगफल खडा गर्याे ।
नामिबियाका भान लिगेनले १११ बलमा १५ बल र एक छक्का प्रहार गरे । कप्तान गेहार्ड इरास्मसले ५३, जान निकालेल लोफ्टी इटोनले ४०, डिभान ला ककले १८ र लो–हान्ड्रे लोउरेन्सले १४ रन जोडे ।
नेपालका ललित राजवंशीले चार विकेट लिए । १० ओभर बलिङ गरेका उनले ३६ रन खर्चिए । यसबाहेक सोमपाल कामीले दुई र सागर ढकालले एक विकेट लिए ।
शृंखलामा नेपालको यो तेस्रो र नामिबियाको चौथो खेल हो ।
शृंखलामा नेपाल र नामिबियासँगै स्कटल्यान्ड सहभागी छन् । वर्षाले बिथोलेपछि नेपाल र नामिबियाबीचको पहिलो खेल रद्द भएको थियो । दोस्रो खेलमा नेपाल स्कटल्यान्डसँग तीन विकेटले पराजित भएको थियो ।
यता नामिबिया भने पहिलो खेलमा स्कटल्यान्डसँग चार विकेटले पराजित भएको थियो । नेपालविरुद्धको दोस्रो खेल रद्द हुँदा नामिबियाले तेस्रो खेलमा स्कटल्यान्डलाई तीन विकेटले हराएको थियो ।
