काठमाडौं । संस्कृति, पर्यटन र नागरिक उड्डयनमन्त्री जीवनराम श्रेष्ठले नेपाल संवत् नेवार समुदाय विशेषको नभइ सबै नेपालीको भएको बताएका छन् । उनले नेपाल संवत्को थालनी गर्ने शङ्खधर साख्वाको नाममा आउँदो वर्षदेखि तीन जनालाई एक/एक लाख नगद राशिसहितको पुरस्कार प्रदान गर्ने गरी संस्कृति मन्त्रालयले कार्यविधि निर्माण गरेको जानकारी दिए ।   

यसैबीच, नेपाल प्रज्ञा–प्रतिष्ठानको संस्कृति विभागले नेपाल संवत् न्हूँदँ राष्ट्रिय समारोह समितिसँगको सहकार्यमा ‘नेपाल संवत् न्हूँदँ’ विषयक विद्वत् गोष्ठी सम्पन्न गरेको छ । 

कार्यक्रममा मन्त्री श्रेष्ठसँगै प्रज्ञा प्रतिष्ठानका निमित्त कुलपति डा. जगमान गुरुङ, प्राज्ञ डा. हेमनाथ पौडेल, प्रा.डा. नरेशमान बज्राचार्य, लुम्बिनी बौद्ध विश्वविद्यालयका पूर्वउपकुलपति प्रा.डा. त्रिरत्न मानन्धरलगायतले बोलेका थिए ।