काठमाडौं । ब्राजिलका फुटबल लिजेन्ड पेले यतिखेर अल्बर्ट आइन्सटाइन अस्पतालको इन्ड अफ लाइफ केयर वार्डमा उपचाररत छन् । 

कोलोरेक्टल (ठूलो आन्द्राको क्यान्सर) सँग जुधिरहेका उनको शरीरमा शुक्रबारयता किमोथेरापीले प्रतिक्रिया नगरिरहेको आइन्सटाइन अस्पतालले जनाएको थियो । अस्पतालको शुक्रबारको रिपोर्टअनुसार पेलेको शरीर सुन्निएको र स्वास्थ्य अवस्था स्थिर थियो । 

शनिबार भने पेलेले इन्स्टाग्राममा आफूलाई बलियो महसुस भएको र ठूलो आशाका साथ उपचार गराइरहेको भन्दै पोस्ट सेयर गरेका थिए । नियमित फलोअपका लागि बुधबार अस्पताल भर्ना भएका उनलाई निमोनिया संक्रमणसमेत देखिएको अस्पतालले जनाएको छ । 

यस्ता थिए पेलेका स्वास्थ्य समस्याहरू

सन् १९४० अक्टोबरमा जन्मिएका एड्सन अरान्ते दो नासिमेन्तो (पेले)को स्वास्थ्यमा तबदेखि समस्या सुरु भयो जब खेलकै क्रममा उनको दुईवटा करङ भाँचिए । यसरको असर उनको दायाँ खुट्टामा प¥यो । 

त्यतिमात्रै नभइ सन् १९७० मा उनको बायाँ मिर्गौलामा संक्रमण देखिएपछि फालिएको थियो । त्यसयता एउटामात्रै मिर्गौला लिएर बाँचिरहेका पेले खेल जीवनमा सक्रिय रहिरहे । यस बीचमा उनलाई मुत्रनलीको संक्रमणले सताइरह्यो ।  

सन् २०१४ नोभेम्बरमा पुनः उनको दायाँ मिर्गौलामा पत्थरी देखियो । शल्यक्रियामार्फत पत्थरी निकालिए पनि उनलाई हेमोडायलायसिस भने निरन्तर गर्नुपर्ने भयो । 

मुत्रनलीको संक्रमणले घरीघरी सताइएका पेलेलाई सन् २०१५ मा भने प्रोटेस्ट बढेर केहीदिन अस्पताल भर्ना गर्नुपरेको थियो । आइन्स्टाइन अस्पतालमा नै निरन्तर उपचार गराइरहेका उनलाई सन् २०१९ मार्चमा फेरी मुत्रनलीमा नै पत्थरी देखिएपछि शल्यक्रिया गरिएको थियो । 

सन् २०२१ मा भने पेलेलाई ठूलो आन्द्रामा ट्युर देखिएपछि सोही अस्पतालमा उनको शल्यक्रिया गरिएको थियो । त्यसयता निरन्तर किमोथेरापी लिइरहेका पेलेलाई पछिल्लोपटक भने गत बुधबार अस्पताल भर्ना गरिएको हो । 

मिर्गौलासँगै हड्डीको समस्या लिएर बाँचिरहेका उनको हिपमा समेत समस्या भएपछि ह्वीलचेयरको सहायतामा थिए । तर, मानसिक रूपमा भने उनी हरेक शल्यक्रियापछि फ्रेस हुने गरेको आइन्स्टाइन अस्पतालका अधिकारीहरूले बताउँदै आएका छन् । 

शनिबारयता भने यी सबै स्वास्थ्य समस्यासँगै निमोनिया संक्रमण भएका पेलेलाई इन्ड अफ लाइफ केयर वार्डमा सारिएको हो । जहाँ बिरामीलाई जीवनको अन्तिम चरणलाई मानसिक तथा भावनात्मक पद्धतिमार्फत फ्रेस बनाउने किसिमका उपचार गरिन्छ ।