काठमाडौं । आईसीसी क्रिकेट विश्वकप लिग–२ मा नेपालले आज स्कटल्यान्डलाई १३८ रनको लक्ष्य प्रस्तुत गरेको छ ।
नामिबियाको विन्डहोकस्थित युनाइटेड क्रिकेट क्लब मैदानमा टस हारेर ब्याटिङका लागि निम्त्याइएको नेपालले ४०.१ ओभरमा सबै विकेट गुमाएर १३७ रनको योगफल तयार पारेको हो ।
नेपालका लागि बलर गुल्सन झाले सबैभन्दा धेरै २९ रन बनाए । पूर्वकप्तान ज्ञानेन्द्र मल्लले २५, अर्जुन साउदले १८, कप्तान रोहितकुमार पौडेलले १७ र आरिफ शेखले १० रन जोडे ।
स्कटल्यान्डका क्रिस सोलेले तीन विकेट लिए भने मार्क वाटले दुई विकेट लिए । ब्रान्डन म्याकमुलेन, सफ्यान सरिफ र माइकल लिस्कले एक एक विकेट लिए ।
लिग–२ मा नेपाल २१ खेलमा १८ अंकसहित छैटौँ स्थानमा छ । स्कटल्यान्ड भने २९ खेलबाट ४२ अंकसहित दोस्रो स्थानमा छ ।
त्रिकोणात्मक शृंखलाको पहिलो खेलमा स्कटल्यान्डले नामिबियालाई ४ विकेटले पराजित गरेको थियो । नेपाल र नामिबियाको खेल वर्षाका कारण नजिताविहीन बन्दा अंक बाँडेको थियो ।