काठमाडौं । भेट्रान स्पिनर नाथन लियोनले चौथो इनिङ्समा ६ विकेट लिएपछि अस्ट्रेलियाले आइतबार वेस्ट इन्डिजविरुद्धको पहिलो टेस्टमा १६४ रनको विजय हासिल गरेको छ । जितसँगै दुई खेलको टेस्ट शृंखलामा अस्ट्रेलियाले १–० को अग्रता लिएको छ ।
पर्थ रंगशालामा ४९८ रनको लक्ष्य पछ्याएको वेस्ट इन्डिजलाई अन्तिम दिन जितका लागि ३०६ रन आवश्यक थियो । भ्रमणकारी वेस्ट इन्डिजले १९२–३ को स्थितिबाट पाँचौँ दिनको सुरुआत गरेको थियो । तर, वेस्ट इन्डिजले ३३३ रन जोड्दा सबै विकेट गुमायो ।
अघिल्लो दिन दुई विकेट लिएका लियोनले अन्तिम दिन थप चार विकेट लिए । ३५ वर्षीय लियोनले ४२.५ ओभरमा १२८ रन दिएर ६ विकेट लिए । लियोनलाई ट्रभिस हेडले दुई तथा मिचेल स्टार्क र जोश हाज्लेउडले एक/एक विकेट लिएर साथ दिएका थिए ।
दोस्रो इनिङ्समा वेस्ट इन्डिजका कप्तान क्राइग ब्रेथह्वाइटले ११० रन बनाए । रोस्टन चेजले ५५, टागेनारिन चन्द्रपाउलले ४५, अल्जारी जोसेफले ४३ रन जोडे । अरू खेलाडीले उल्लेख्य प्रदर्शन गर्न सकेनन् ।
वेस्ट इन्डिजले पहिलो इनिङ्समा २८३ रन बनाएको थियो । पहिलो इनिङ्समा वेस्ट इन्डिजका लागि कप्तान ब्रेथह्वाइटले ६४, चन्द्रपाउलले ५१, जेरेमी ब्ल्याकउडले ३६, शामर ब्रुक्सले ३३ रन बनाएका थिए ।
पहिलो इनिङ्समा अष्ट्रेलियाका लियोनले दुई विकेट लिएका थिए । स्टार्क र पाट कमिन्सले समान तीन विकेट लिँदा हाज्लेउड र क्यामरुन ग्रीनले समान एक/एक विकेट लिए ।
अष्ट्रेलियाले चार विकेट गुमाएर ५९८ रन बनाउँदा पहिलो इनिङ्स समाप्तिको घोषणा गरेको थियो । टस जितेर ब्याटिङ थालेको अष्ट्रेलियाका लागि पहिलो इनिङ्समा मार्नुस लाबुसेनले २०४ रन बनाए । पूर्वकप्तान स्टिभ स्मिथले अविजित २०० रन जोडे । ट्रभिस हेडले ९९ रन बनाउँदा उस्मान ख्वाजाले ६५ रनको योगदान गरे ।
वेस्ट इन्डिजका ब्रेथह्वाइटले दुई विकेट लिँदा काइल मायर्स र जेडेन सिल्सले एक/एक विकेट लिए ।
पहिलो इनिङ्समा ३१५ रनको अग्रता लिएको अष्ट्रेलियाले दोस्रो इनिङ्समा दुई विकेट गुमाएर १८२ रन बनाउँदा इनिङ्स समाप्तिको घोषणा गरेको थियो । दोस्रो इनिङ्समा लाबुसेनले अविजित १०४ रन बनाउँदा डेभिड वार्नरले ४८ रन जोडे । स्मिथ २० रनमा अविजित रहे । वेस्ट इन्डिजका केमर रोच र रोष्टन चेजले एक/एक विकेट लिए ।
अस्ट्रेलिया र वेस्ट इन्डिजबीचको दोस्रो टेस्ट बिहीबारदेखि एड्लेइड क्रिकेट मैदानमा हुनेछ ।