काठमाडौं । आईसीसी क्रिकेट विश्वकप लिग–२ का लागि नामिबिया भ्रमणमा रहेको नेपालले आज दोस्रो खेलमा स्कटल्यान्डविरुद्ध खेल्दै छ ।
घरेलु टोली नामिबियाविरुद्धको पहिलो खेल वर्षाले प्रभावित भएपछि नेपालको खेल नतिजाविहीन बनेको थियो । विन्डहोकस्थित युनाइटेड क्रिकेट क्लब मैदानमा नामिबियाले १९८ रनको लक्ष्य पछ्याउने क्रममा चार बल खेलेर चार रन बनाउँदा वर्षाले खेल रोकिएको थियो । त्यसपछि खेल सम्भव नभएपछि नेपाल र नामिबियाबीचको खेल नतिजाविहीन बनेको हो ।
टस हारेर ब्याटिङका लागि निम्त्याइएको नेपालले ४९.५ ओभरमा सबै विकेट गुमाएर १९७ रन बनाएको थियो ।
नेपालले आज स्कटल्यान्डविरुद्ध पनि विन्डहोकस्थित युनाइटेड क्रिकेट क्लब मैदानमै खेल्नेछ । खेल नेपाली समयअनुसार दिउसो १ः४५ बजे सुरु हुनेछ ।
२१ खेलबाट १८ अंक जोडेको नेपाल छैटौँ स्थानमा छ । ओमान ४४ अंकका साथ शीर्ष स्थानमा छ । ४२ अंक जोडेको स्कटल्यान्ड दोस्रो, ३५ अंक जोडेको अमेरिका तेस्रो, ३३ अंक जोडेको नामिबिया चौथो र यूएई २७ अंकसाथ पाँचौँ स्थानमा छ । ओमान र अमेरिकाले सबै ३६ खेल खेलिसकेका छन् ।
