काठमाडौं । मलेसिया एयरलाइन्सले ‘बिजनेस क्लास’मा यात्रारत भारतीय क्रिकेटरलाई यात्रा दौरान खाना नदिएको र खराब व्यवहार प्रदर्शन गरेको सार्वजनिक भएको छ । भारतीय क्रिकेटर दीपक चहरले यस्तो खुलासा गरेका हुन् । 

बंगलादेश यात्राका क्रममा मलेसिया एयरलाइन्स आफूहरूलाई जानकारी नै नदिई उडान तालिका परिवर्तन गरेको र बिजनेस क्लासमा यात्रा गरे पनि खानाको समेत व्यवस्था नभएको चहरले बताएका छन् । उनले ट्विट गर्दै आफ्नो यसपटकको यात्रा खराब रहेको बताएका छन् । 

चहरले बिनाखानाको खराब यात्रापछि फेरि मलेसिया एयरलाइन्सले अर्को दुःख दिएको पनि बताएका छन् । उनले आफूहरूको उडान सकिएको २४ घण्टासम्म लगेजका लागि कुर्नुपरेको बताएका छन् । 

“मलेसिया एयरलाइन्ससँग यात्रा गर्नु निकै नराम्रो अनुभव थियो । सबैभन्दा पहिले, तिनीहरूले मलाई जानकारी नगरी हाम्रो उडान परिवर्तन गरे । बिजनेस क्लासमा पनि खाना खुवाइएको छैन,” उनले ट्विट गरेका छन्, “अब हामी पछिल्लो २४ घण्टादेखि हाम्रो सामान प्राप्त गर्न पर्खिरहेका छौं । सोच्नुहोस्, भोलि (आइतबार) हामीले खेल पनि खेल्नुपर्छ ।”

भारतीय क्रिकेट टोली यति बेला बंगलादेशको भ्रमणमा छ । जहाँ दुई टोलीबीच तीन एकदिवसीय र दुई टेस्टको शृंखला हुनेछ ।

Had a worse experience traveling with Malaysia airlines @MAS .first they changed our flight without telling us and no food in Business class now we have been waiting for our luggage from last 24hours .imagine we have a game to play tomorrow ? #worse#experience#flyingcar

— Deepak chahar ?? (@deepak_chahar9) December 3, 2022