काठमाडौं । समूह चरणको अन्तिम खेलमा सर्वियामाथि ३–२ को विजय हासिल गर्दै स्विट्जरल्यान्डले शुक्रबार राति कतार विश्वकपको अन्तिम–१६ मा स्थान पक्का गरेको छ । 

सर्वियासँग पराजित भएको भए स्विट्जरल्यान्ड प्रतियोगिताबाट बाहिरिने थियो । बराबरी खेल्दा पनि क्यामरुन र ब्राजिलको नतिजा कुर्नुपर्ने थियो । पहिलो हाफमै चार गोल भएको थियो । स्विट्जरल्यान्डले जर्दान साकिरीको गोलबाट २०औँ मिनेटमा अग्रता लिएको थियो । २६औँ मिनेटमा सर्वियाका एलेक्जेन्डर मित्रोभिकले बराबरी गोल फर्काए । ३५औँ मिनेटमा डुसान भ्लाहोभिकले गरेको गोलबाट सर्वियाले अग्रता लियो । ४४औँ मिनेटमा स्विट्जरल्यान्डका ब्रेल इम्बोलोले बराबरी गोल फर्काए । 

दोस्रो हाफको सुरुमै रेमो फ्रेउलर अर्को गोल थपे । ४८औँ मिनेटमा फ्रेउलरले गरेको गोल स्विट्जरल्यान्डलाई अन्तिम–१६ मा स्थान बनाउन पर्याप्त बन्यो । 

जितसँगै समूह ‘जी’मा स्विटरल्यान्ड र ब्राजिलको समान ६ अंक छ । तर, गोलअन्तरमा ब्राजिल समूह विजेता बन्दा स्विट्जरल्यान्ड उप विजेता बन्यो । उपविजेता स्विट्जरल्यान्डले समूह ‘एच’को विजेता पोर्चुगलविरुद्ध खेल्नेछ । विजेता ब्राजिलले अब अन्तिम–१६ मा समूह ‘एच’को उपविजेता दक्षिण कोरियाविरुद्ध खेल्नेछ । 

गएराति नै सम्पन्न खेलमा दक्षिण कोरियाले पोर्चुगललाई २–१ ले पराजित गर्दै अन्तिम–१६ मा स्थान पक्का गरेको थियो । उक्त समूहमा उरुग्वेले घानालाई २–० ले पराजित गरे पनि लिग चरणमा विपक्षीविरुद्ध कम गोल गरेको आधारमा विश्वकपबाट बाहिरिएको हो ।