काठमाडौं । इन्जुरी टाइममा हि चान ह्वाङले गरेको गोल निर्णायक बनेपछि शुक्रबार पोर्चुगललाई २–१ ले पराजित गर्दै दक्षिण कोरिया समूह ‘एच’ को उपविजेता बन्दै अन्तिम १६ मा प्रवेश गरेको छ ।
दक्षिण कोरिया १२ वर्षपछि विश्वकपको नकआउट चरणमा प्रवेश गरेको हो । दक्षिण कोरिया पछिल्लो पटक २०१० मा प्रिक्वार्टरफाइनल प्रवेश गरेको थियो ।
दक्षिण कोरियासँग हारका बाबजुद पोर्चुगल समूह विजेताको रूपमा प्रिक्वार्टरफाइलनमा प्रवेश गरेको छ ।
कतारको एजुकेसन सिटी रंगशालामा सम्पन्न खेलमा पोर्चुगलले अग्रत बनाएपनि दक्षिण कोरियाले पुनरागमन गर्दै जित निकालेको हो ।
पाँचौ मिनेटमा रिकार्डो होर्टाले गरेको गोलबाट पोर्चुगलले अग्रता बनाएको थियो । तर, किम योङ गोनले २७ औँ मिनेटमा गोल गर्दै दक्षिण कोरियालाई बराबरीमा फर्काएका थिए ।
यस्तै, इन्जुरी टाइममा चान ह्वाङले गोल गरेपछि दक्षिण कोरियाले २–१ को जित निश्चित गर्यो । सन ह्युङ मिनले मध्य मैदानबाट ल्याएको बल बक्सबाहिरबाट चान ह्वाङलाई निकालेका थिए । जसलाई चान ह्वाङले पहिलो ‘टच’ मा जाली चुमाए ।
दक्षिण कोरियाले जित निकालेसँगै अर्को खेलमा घानालाई २–० पराजित गरेपनि फेयर प्लेका आधारमा दुई पटकको च्याम्पियन उरुग्वे भने समूह चरणबाटै बाहिरिएको छ ।
समूहमा दक्षिण कोरिया र उरुग्वेले समान चार अंक जोड्दा गोलअन्तर पनि दुवै टिमको सुन्य रहेपछि कोरिया फेयर प्लेका आधारमा नकआउट चरण प्रवेश गरेको हो ।
समूहको शीर्ष स्थानमा रहेको पोर्चुगलले तीन खेलबाट ६ अंक जोड्यो । यस्तै, समूहको पुछारमा रहेको घानाले तीन अंकमात्र जोड्न सक्यो ।