काठमाडौं । फिफा विश्वकपअन्तर्गत आज (बिहीबार) भएको समूह चरणको अन्तिम खेलमा क्रोएसियासँग बराबरीमा रोकिँदा बेल्जियम समूह चरणबाटै बाहिरिएको छ ।
अन्तिम १६ मा पुग्नका लागि आज समूह ‘एफ’मा बेल्जियमलाई जित्नैपर्ने दबाब थियो । तर, कतारको अहमेद बिन अली रंगशालामा साविक उपविजेतासँग बराबरीमा रोकिएपछि बेल्जियम समूह चरणबाटै बाहिरियो । यो बराबरीले भने क्रोएसिया समूह उपविजेताको रूपमा प्रिक्वार्टरफाइनल प्रवेश गरेको छ । बेल्जियम पछिल्लो संस्करण विश्वकपमा तेस्रो भएको थियो ।
यता यही समयमा भएको अर्को खेलमा क्यानडालाई २–१ ले पराजित गर्दै मोरोक्को समूह ‘एफ’ को विजेता बन्दै अन्तिम १६ मा प्रवेश गर्यो ।
बिहीबार कतारको अल थुमामा रंगशालामा सम्पन्न खेलमा मोरोक्कोलाई जित दिलाउँन हाकिम जियाच र युसेफ एन नेस्हरीले गोल गरे । क्यानडाले मोरोक्कोका नयेफ अग्युर्डबाट आत्मघाती गोल उपहार पाएको थियो ।
यो जितसँगै समूहको शीर्ष स्थानमा रहेको मोरोक्कोले तीन खेलबाट सात अंक जोड्यो । समान खेलबाट पाँच अंक जोडेको क्रोएसिया दोस्रो स्थानमा रहँदै अन्तिम १६ मा प्रवेश गर्यो ।
तीन खेलबाट चार अंक जोडेको बेल्जियम र अंकविहीन क्यानडा भने विश्वकपको पहिलो चरणबाटै बाहिरिएका छन् ।