काठमाडौं । फिफा विश्वकपअन्तर्गत आज (बिहीबार) जारी समूह ‘एफ’को खेलमा मोरोक्कोले क्यानडाविरुद्ध पहिलो हाफमा २–१ को अग्रता बनाउँदा अर्को खेलमा क्रोएसिया र बेल्जियमले गोलरहित बराबरी खेलेका छन् ।

कतारको अलथुमामा रंगशालामा जारी खेलको चौथो मिनेटमै हाकिम जियाचले गरेको गोलबाट क्यानडाविरुद्ध मोरोक्कोले अग्रता बनाएको थियो । २३ औँ मिनेटमा युसेफ एन नेस्रीले मोरोक्कोको अग्रता दोब्बर पारेका थिए । 

यस्तै, ४० औं मिनेटमा मोरोक्कोका नायेफ अग्युर्डबाट आत्मघाती गोल भएपछि क्यानडाले अग्रतालाई २–१ मा ल्याएको थियो ।

आज हुने खेलमा जित निकाले मोरोक्को समूह ‘एफ’को विजेताको रुपमा अन्तिम १६ मा प्रवेश गर्नेछ । यता अन्तिम खेलअगावै विश्वकपबाट बाहिरिसकेको क्यानडाका लागि भने यो प्रतिष्ठाको खेलमात्र बनेको छ ।

यस्तै, कतारको अहमेद बिन अली रंगशालामा जारी समूह ‘एफ’कै अर्को खेलमा क्रोएसिया र बेल्जियमको पहिलो हाफ गोलरहित बराबरीमा सकिएको छ । अन्तिम–१६ मा स्थान बनाउन आज दुवै टिम जित्नैपर्ने दबाबमा छन् ।