काठमाडौं । नेपाल राष्ट्र बैंकका गभर्नर महाप्रसाद अधिकारीले चालु पुँजी कर्जासम्बन्धी नीति संशाेधन गर्न राष्ट्र बैंक तयार गरेको बताएका छन् ।
नेपाल आर्थिक पत्रकार समाज (सेजन)को २६औँ वार्षिकोत्सवमा गभर्नर अधिकारीले सबै अनुशासनमा बसे यो नीति संशोधन गर्न राष्ट्र बैंक तयार रहेको बताए । उनले बजारलाई अनुशासनमा राख्न राष्ट्र बैंकले चालु पुँजी कर्जासम्बन्धी नीति कार्यान्वयनमा ल्याएको बताए ।
“निरन्तर छलफल गरेर चालु पुँजी कर्जासम्बन्धी नीति कात्तिक १ गतेबाट कार्यान्वयनमा ल्याएका हौँ । अझै पनि सरोकारवाला निकायका केही असहमति छन् भने संशोधन गर्न हामी तयार छौं,” उनले भने, “संविधान त संशोधन हुन्छ भने सरकारले ल्याएको नीति संशोधन नहुने भन्ने कुरै हुँदैन । अनुशासनमा सबै बस्नैपर्छ । अनुशासनमा बस्नुपर्छ भन्ने सोचले नै चालु पुँजी कर्जासम्बन्धी नीति कार्यान्वयन गरिएको हो ।”
चालु पुँजी कार्जासम्बन्धी नीति केही समयका लागि स्थगन गर्नुपर्ने माग व्यवसायीहरूले गर्दै आएका छन् ।
गभर्नर अधिकारीले पछिल्लो समय अर्थतन्त्र सुधाराेन्मुख दिशामा रहेको बताए । राष्ट्र बैंकले समयमा नै अर्थतन्त्रलाई संकटमा जानबाट बचाउन सफल भएको पनि उनको भनाइ थियो ।