काठमाडौं । कतार विश्वकपको अन्तिम–१६ मा स्थान बनाउन जित्नै पर्ने दबाबमा रहेको अर्जेन्टिनाले बुधबार राति समूह चरणको अन्तिम खेलमा पाँच खेलाडी परिवर्तन गरेको छ । 

अर्जेन्टिनाका प्रशिक्षक लियानल स्कालोनीले लाउटारो मार्टिनेजलाई बेन्चमा राखेका छन् भने मेक्सिकोविरुद्ध गोल गरेका इन्जो फर्नान्डेजलाई पहिलो रोजाइमा राखेका छन् । 

मेक्सिकोविरुद्ध खेलेको टिमका इमिलियानो मार्टिनेज, निकोलस ओटामेन्डी, रोड्रिगो डी पाउल, मार्कोस अकुना, एलेक्सिस म्याक एलिस्टर, एन्जेल डी मारिया र लियोन मेसीले मात्र निरन्तरता पाएका छन् । मार्टिनेज, लिसान्द्रो मार्टिनेज, गोन्जालो मोन्टियल र गुइडो रोड्रिग्वेजको स्थानमा नाहेल मोलिना, क्रिष्टियन रोमेरो, फर्नान्डेज र युलियन अल्भारेजले पहिलो रोजाइमा स्थान बनाएका छन् । 

पोल्यान्डले भने एक खेलाडी परिवर्तन गरेको छ । साउदी अरबविरुद्ध खेलेको टिमका अर्काडिउज मिलिकको स्थानमा कारोल स्विडेरस्कीलाई मौका दिइएको छ । 

समूह ‘सी’मा पोल्यान्ड ४ अंकका साथ शीर्ष स्थानमा छ भने समान ३ अंक जोडेका अर्जेन्टिना र साउदी अरब क्रमशः दोस्रो र तेस्रो स्थानमा छन् । एक अंक जोडेको मेक्सिको पुछारमा छ । मेक्सिकोले आज साउदी अरबसँग प्रतिस्पर्धा गर्नेछ । 

अन्तिम–१६ मा स्थान बनाउन कस्तो छ समूह ‘सी’ को समीकरण ?

पोल्यान्ड जित वा बराबरको नतिजाले पनि अन्तिम–१६ मा प्रवेश गर्नेछ । तर, पोल्यान्ड हार्दा साउदी अरेबियाले जित निकाले रोबर्ट लेवान्डोवस्कीको टिम समूह चरणबाटै बाहिरिनेछ । 

यदि पोल्यान्ड पराजित भए अर्को खेलमा साउदी अरेबियाले मेक्सिकोसँग बराबर खेले यी दुई टिममध्ये गोलअन्तर उच्च हुने टिम नकआउटमा पुग्नेछ । पोल्यान्ड पराजित हुँदा साउदी अरेबियाले मेक्सिकोसँग हार बेहोरे पोल्यान्ड र मेक्सिकोबाट राम्रो गोलअन्तर हुने टिम अन्तिम–१६ मा प्रवेश गर्नेछ ।

विश्वकपको नकआउट चरणमा पुग्न अर्जेन्टिनालाई भने जितको दबाब छ । तर, अर्को खेलमा मेक्सिको र साउदी अरेबियाले बराबर खेले अर्जेन्टिनालाई बराबरीको नतिजा नै नकआउट चरणका लागि पर्याप्त बन्नेछ । यद्यपि, अर्जेन्टिना बराबरीमा रोकिँदा साउदी अरेबियाले मेक्सिकोलाई पराजित गरे लियोनल मेसीको टिम समूह चरणबाटै घर फर्किनेछ ।

यदि मेक्सिकोले साउदी अरेबियालाई पराजित गरे अर्जेन्टिना बराबरीमै रोकिए पनि यी दुई टिमबीच राम्रो गोलअन्तर रहने टिम अन्तिम–१६ मा प्रवेश गर्नेछ । तर, हारको नतिजाले भने अर्जेन्टिना समूह चरणबाटै बाहिरिनेछ ।

मेक्सिकोविरुद्ध जित निकाले साउदी सोझै नकआउट चरणमा पुग्नेछ । अर्को खेलमा पोल्यान्डले अर्जेन्टिनालाई पराजित गरे साउदीलाई नकआउट चरणका लागि बराबरीको नतिजा पनि पर्याप्त हुनेछ । तर, साउदी हार्दा अर्जेन्टिना र पोल्यान्डले बराबरी खेले साउदी विश्वकपबाट बाहिरिनेछ ।

यदि अर्जेन्टिनाले पोल्यान्डलाई पराजित गरे साउदी मेक्सिकोसँग बराबरीमा रोकिए पनि पोल्यान्ड र साउदीबीच गोलअन्तर राम्रो हुने टिम अन्तिम–१६ मा प्रवेश गर्नेछ । तर, हारको नतिजाले भने साउदीको विश्वकप यात्रा समूह चरणमा नै सीमित बन्नेछ ।

यता, यो समूहमा सबैभन्दा झिनो सम्भावना बोकेको मेक्सिकोलाई जित्नैपर्ने दबाब छ । पोल्यान्डसँग अर्जेन्टिना पराजित हुँदा साउदीविरुद्ध जितसहित मेक्सिको अन्तिम–१६ मा प्रवेश गर्नेछ । मेक्सिकोले जित निकाले पनि पोल्यान्ड र अर्जेन्टिनाले बराबरी खेले मेक्सिको र अर्जेन्टिनामा गोलअन्तर राम्रो हुने टिम नकआउट चरणमा प्रवेश गर्नेछ ।

मेक्सिकोले साउदीलाई हराउँदा अर्जेन्टिनाले पोल्यान्डलाई पराजित गरे मेक्सिको र पोल्यान्डबीच उच्च  गोलअन्तर हुने टिम नकआउट चरणमा प्रवेश गर्नेछ । तर, मेक्सिकोले साउदी अरेबियासँग हार बेहोरे समूह चरणबाटै घर फर्किनेछ ।