काठमाडौं । कतार विश्वकपको अन्तिम–१६ मा स्थान बनाउनका लागि संघर्ष गरिरहेका डेनमार्क र अस्ट्रेलियाले समूह चरणको अन्तिम खेलको पहिलो हाफमा गोलरहित बराबरी खेलेका छन् ।
अस्ट्रेलियाले अघिल्लो खेलको टिममा एक खेलाडी परिवर्तन गरेको थियो । फ्रान कारासिकको स्थानमा मिलोस डेगेनेकलाई टिममा समावेश गरेको थियो । डेनमार्कले भने अघिल्लो खेलको तुलनामा तीन खेलाडी परिवर्तन गरेको छ । मार्टिन ब्रेथह्वाइट, आन्द्रेस स्कोभ ओल्सेन र म्याथिस जेनसेनले टिममा स्थान बनाएका छन् । फ्रान्सविरुद्ध खेलेका मिकेल ड्याम्सगार्ड, आन्द्रेस कोर्नेलियस र जेस्पर लाइनस्ट्रोम बेन्चमा छन् ।
डेनमार्कले ट्युनिसियासँग गोलरहित बराबरी खेलेको थियो भने फ्रान्ससँग २–१ ले पराजित भएको थियो । अस्ट्रेलिया पहिलो खेलमा फ्रान्ससँग ४–१ ले पराजित भएको थियो भने ट्युनिसियालाई १–० ले पराजित गरेको छ ।
अन्तिम–१६ मा पुग्न कस्तो छ समीकरण ?
सहज अवस्थामा रहेको फ्रान्सले आज ट्युनिसियालाई हराए समूह विजेता बन्नेछ । फ्रान्सले ट्युनिसियासँग हार बेहोर्दा अर्को खेलमा अस्ट्रेलियाले डेनमार्कलाई पराजित गरे फ्रान्स र अस्ट्रेलियाको बराबर अंक हुनेछ । यस्तोमा गोलअन्तरका आधारमा समूह विजेता र उपविजेताको टुंगो लाग्नेछ ।
यता, कठिन अवस्थामा रहेको ट्युनिसियालाई भने आज अन्तिम–१६ को झिनो सम्भावना कायम राख्न फ्रान्सविरुद्ध जित्नैपर्ने दबाब छ । यता फ्रान्सलाई हराउँदा अर्को खेलमा डेनमार्कले अस्ट्रेलियालाई हराए मात्र ट्युनिसिया गोलअन्तरको आधारमा डेनमार्कलाई पछि पार्दै अन्तिम १६ मा प्रवेश गर्न सक्छ । यसका लागि ट्युनिसियालाई डेनमार्कको भन्दा राम्रो गोलअन्तर आवश्यक हुन्छ ।
यदि फ्रान्सले ट्युनिसियालाई पराजित गरे अस्ट्रेलियालाई बराबरीको नतिजा पनि अन्तिम–१६ का लागि पर्याप्त बन्नेछ । यदि डेनमार्कसँग अस्ट्रेलिया बराबरीमा रोकिँदा ट्युनिसियाले फ्रान्सलाई पराजित गरे अस्ट्रेलिया र डेनमार्कबीच गोलअन्तर राम्रो हुने टिमले अन्तिम–१६ मा स्थान बनाउनेछ । तर, आज हार बेहोरे अस्ट्रेलिया समूह चरणबाटै घर फर्किनेछ ।
डेनमार्कलाई जित्नैपर्ने दबाब छ । अर्को खेलमा फ्रान्सले डेनमार्कलाई पराजित गरे डेनमार्कले अस्ट्रेलियालाई हराउँदा सोझै अन्तिम–१६ मा स्थान पक्का गर्नेछ । डेनमार्कले अस्ट्रेलियालाई हराए पनि यदि फ्रान्स ट्युनिसियासँग पराजित भए डेनमार्क र ट्युनिसियाबीच गोलअन्तर राम्रो हुने टिम नकआउट चरणमा प्रवेश गर्नेछ ।