काठमाडौं । नेपालमा चालु आर्थिक वर्ष २०७९/०८० को चार महिनामा करिब आठ अर्ब रुपैयाँको एक हजार ११६ किलोग्राम सुन आयात भएको छ ।
भन्सार विभागले सार्वजनिक गरेका चालु आर्थिक वर्षको पहिलो चौमासिक विवरणअनुसार तीन देशबाट सात अर्ब ९५ करोड १८ लाख ७२ हजार रुपैयाँको सुन आयात भएको छ ।
विभागका अनुसार नेपालमा स्विटजरल्यान्ड, टर्की र संयुक्त अरब इमिरेट्स गरी तीन देशबाट नेपालमा सुन आयात भएको छ ।
यसमध्ये स्विट्जरल्यान्डमा १०० किलोग्राम सुन आयात भएको छ । यस्तै, टर्कीबाट १५० किलोग्राम र संयुक्त अरब इमिरेट्सबाट ८६६.५४ किलोग्राम सुन आयात भएको विभागले जनाएको छ ।
सरकारले पहिलो चौमासिकमा सुन आयातबाट ९४ करोड रुपैयाँ राजस्व संकलन गरेको छ । सरकारले साउनदेखि कात्तिकसम्म कुल ९४ करोड ९० लाख ६६ हजारको राजस्व संकलन गरेकाे विभागले जनाएको छ ।
नेपालमा अहिले सुन आयातको लागि वाणिज्य बैंकहरूलाई मात्र अनुमति दिएको छ । जसअनुसार वाणिज्य बैंकहरूले पालैपालो सुन आयात गर्छन् । वाणिज्य बैंकले सुनचाँदी व्यवसायीलाई कोटा अनुसार बिक्री गर्छन् ।
