काठमाडौं । वाङ्मय शताब्दी पुरुष तथा संस्कृतिविद् सत्यमोहन जोशीको ४५ दिनको पूण्य तिथिमा श्रद्धाञ्जली सभा आयोजन गर्दै श्रद्धा सुमन अर्पण गरिएको छ ।
मंगलबार लेखनाथ साहित्य सदन सोह्रखुट्टेमा आयोजित कार्यक्रममा प्रमुख अतिथि शिक्षाविद् प्रा.डा. सुरेशराज शर्माले जोशीसँगका केही स्मृति सुनाए । उनले काठमाडौं विश्वविद्यालयले पहिलो पटक मानार्थ विद्यावारिधि संस्कृतिविद् सत्यमोहन जोशीलाई प्रदान गरेको स्मरण गरे ।
शर्माले भने, "एउटा कार्यक्रममा सत्यमोहनजीले भृकुटी र अरनिकोका बारेमा दुई घण्टासम्म धाराप्रवाह बोल्नुभयो । उक्त कार्यक्रममा उपस्थित सबै मन्त्रमुग्ध थिए ।"
शताब्दी पुरुष सत्यमोहनका पुत्र अणुराज जोशीले कार्यक्रममा बोल्दै आफ्ना पिताजीका बारेमा बताउँदै आफूले उनका कतिपय कृति अंग्रेजी भाषामा अनुवाद गरेको बताए । उनले पछिल्ला वर्षहरूमा आफ्ना पिताजीले नेपाली साहित्यकारले नोबेल पुरस्कार प्राप्त गरेको हेर्ने चाहना राखेको बताउँदै आएको उल्लेख गरे ।
जोशीले भी.एस. नैपालको नाम उल्लेख गर्दै भने, "तर नेपाली मूलका एक व्यक्तिले नोबेल पुरस्कार पाएको र उनले नोबेल स्पीचमा आफू नेपाली मूलको भएको उल्लेख गरेका थिए । अध्ययन अनुसन्धान गर्नेहरूले यस विषयमा बृहत्त खोजी गर्नुपर्ने देखिएको छ ।"
कर्मयोगी बद्रीविक्रम थापा स्मृति सेवा गुठीको सहकार्यमा नेपाली शिक्षा परिषद्द्वारा आयोजित उक्त कार्यक्रममा रमा शर्मा, सुरेशराज चालिसे, किरण थापा, शंकर पाण्डे, प्रह्लाद पोखरेललगायतले बोले ।