काठमाडौं । समूह चरणको अन्तिम खेलमा आयोजक कतारलाई २–० ले पराजित गर्दै नेदरल्यान्ड्स समूह ‘ए’को विजेताको रूपमा फिफा विश्वकपको प्री–क्वार्टरफाइनलमा प्रवेश गरेको छ ।
मंगलबार कतारको अल बायत रंगशालामा नेदरल्यान्ड्सलाई जित दिलाउन कोडी गक्पो र फ्रायङ्की डी योङले गोल गरे । २६ औँ मिनेटमा गक्पोको गोलबाट अग्रता बनाएको नेदरल्यान्ड्सका फ्रायङ्की डी योङले ४९ औँ मिनेटमा अग्रता दोब्बर पारेका थिए ।
जितसँगै तीन खेलबाट सात अंक जोडेको नेदरल्यान्ड्सले शीर्ष स्थानमा रहँदै अन्तिम–१६ को यात्रा तय गर्यो । यस्तै, आजै भएको अर्को खेलमा इक्वेडरलाई पराजित गर्दै सेनेगल यो समूहको उपविजेताको रूपमा प्री–क्वार्टरफाइनल प्रवेश गर्यो । सेनेगलले तीन खेलबाट ६ अंक जोड्यो ।
समान खेलबाट चार अंक जोडेको इक्वेडर र अंकविहीन कतार भने प्रतियोगिताको पहिलो चरणबाटै बाहिरिए । आयोजक कतारले समूह चरणका कुनै पनि खेलमा जित निकाल्न सकेन ।
नेदरल्यान्ड्सले पहिलो खेलमा सेनेगललाई २–० ले पराजित गर्दा दोस्रो खेलमा इक्वेडरसँग १–१ को बराबरी खेल्दै अंक बाँडेको थियो ।