नैरोबी । केन्यामा कन्डमको अभाव भएपछि नागरिक समाज समूहहरूले गुनासो गरेका छन् । केन्यामा कन्डम विदेशबाट आयात गरेर वितरण गरिन्छ । तर, अहिले आयात कर बढाइएपछि आपूर्तिकर्ताहरूले केन्यामा नि:शुल्क कन्डम वितरण कार्य रोकेका छन् ।
कन्डमले नयाँ एचआईभी संक्रमण रोक्न महत्त्वपूर्ण भूमिका निभाउने भएकाले सामाजिक कार्यकर्ताहरूले सरकारलाई कन्डममाथि लगाइने कर यथाशीघ्र घटाउन आग्रह गरिरहेका छन् ।
केन्यामा वार्षिक करिब ४५ करोड ५० लाख कन्डमको माग हुन्छ । तर, सरकारले १५ करोडको सङ्ख्यामा मात्रै कन्डम उपलब्ध गराउन सकिरहेको छ । एचआईभीलगायत अन्य यौनजन्य रोगहरूको रोकथामका लागि कन्डम निकै उपयोगी साधन हो ।
तीनवटा कन्डम रहेको एक प्याकेटको केन्याको बजारमा अहिले करिब एक अमेरिकी डलर पर्छ । केन्यामा बर्सेनि करिब ३४ हजार नयाँ एचआईभी संक्रमित थपिने गरेका छन् । तर, सन् २०२० यता विशेषगरी देहव्यापारीहरूमा एचआईभी अत्यन्तै तीव्र गतिमा बढिरहेको छ ।
हिन्दुस्तान टाइम्सबाट ।