काठमाडौं । रोबर्ट लेवान्डोवस्कीले फिफा विश्वकपमा पहिलो गोल गर्दा शनिबार समूह ‘सी’ को खेलमा पोल्यान्डले साउदी अरेबियालाई २–० ले हराएको छ ।
कतारको एजुकेसन सिटी रंगशालामा सम्पन्न खेलको ३९ औं मिनेटमा पिओटर जिलिन्स्कीले गोल गर्दै पोल्यान्डलाई अग्रता दिलाएका थिए । रोबर्ट लेवान्डोस्कीको असिस्टमा जिलिन्स्कीले गोल गर्दै पोल्यान्डलाई अग्रता दिलाएका हुन् ।
पहिलो हाफको इन्जुरी टाइममा साउदीले पेनाल्टीको अवसर पाए पनि त्यसको सदुपयोग गर्न नसक्दा बराबरीको सुनौलो अवसर गुमायो ।
पोल्यान्डका क्रिस्टियन बिएलिकले पेनाल्टी क्षेत्रभित्र सलेह अल सेहरीमाथि फाउल गरेपछि साउदीले भिडियो असिस्टेन्ट रेफ्री (भार)को सहयोगमा पेनाल्टी पाएको थियो । तर, पेनाल्टी प्रहारका लागि अघि आएका सलिम अल ड्वसरी गोल गर्न सकेनन् ।
पहिलो हाफमा एक गोल गरेको पोल्यान्डले दोस्रो हाफमा पनि एक गोल थप्यो ।
खेलको निर्धारित समय सकिन आठ मिनेट बाँकी रहदा लेवान्डोस्कीले गोल गरेपछि पोल्यान्डले २–० को जित निश्चित गर्यो । विश्वकपमा लेवान्डोस्कीको यो पहिलो गोल हो ।
जितसँगै दुई खेलबाट चार अंक जोडेको पोल्यान्ड तालिकाको शीर्ष स्थानमा उक्लिएको छ । समान खेलबाट तीन अंक जोडेको साउदी तालिकाको दोस्रो स्थानमा झरेको छ । समूहबाट शीर्ष दुई टिम अन्तिम–१६ मा प्रवेश गर्नेछन् ।
यसअघि पहिलो खेलमा पोल्यान्डले मेक्सिकोसँग गोलरहित बराबरी खेल्दै अंक बाड्दा साउदीले अर्जेन्टिनालाई २–१ ले हराएको थियो ।