काठमाडौं । ब्रिल इम्बोलोको निर्णायक गोलमा स्विट्जरल्यान्डले बिहीबार समूह ‘जी’ को आफ्नो पहिलो खेलमा क्यामरुनलाई १–० ले पराजित गर्दै कतारमा जारी फिफा विश्वकपमा सुखद् सुरुआत गरेको छ ।
कतारको अल जुनौब रंगशालामा स्विट्जरल्यान्डलाई जितसहित महत्वपूर्ण तीन अंक दिलाउन इम्बोलोले ४८ औं मिनेटमा निर्णायक गोल गरे । जेड्रान साक्विरीले गरेको क्रसमा १८ यार्ड बक्सभित्र रहेका इम्बोलोले उत्कृष्ट ‘फस्र्ट टच फिनिसिङ’ दिए ।
गोल गरे पनि क्यामरुन आफ्नो जन्मभूमि भएकाले इम्बोलोले गोलको खुसियाली भने मनाएनन् । क्यामरुनमा जन्मिए पनि इम्बोलोले सन् २०१५ देखि स्विट्जरल्यान्डको राष्ट्रिय टिमबाट खेल्दै आएका छन् ।
यो समूहमा स्विट्जरल्यान्ड र क्यामरुनसँगै ब्राजिल र सर्विया छन् । समूहबाट शीर्ष दुई टिमले अन्तिम १६ मा स्थान बनाउनेछन् ।
विश्वकपअन्तर्गत आजै हुने दोस्रो खेलमा साँझ ६ः४५ बजे समूह ‘एच’का दक्षिण कोरिया र उरुग्वे भिड्दै छन् । यस्तै, तेस्रो खेलमा राति ९ः४५ बजे समूह ‘एच’ कै पोर्चुगल र घाना खेल्दा राति १२ः४५ बजे समूह ‘जी’ का ब्राजिल र सर्विया खेल्दै छन् ।