काठमाडौं । पाँच पटकको विश्वविजेता ब्राजिलले आज (बिहीबार) समूह ‘जी’ मा सर्वियाविरुद्ध खेल्दै कतार विश्वकपमा आफ्नो यात्रा सुरु गर्नेछ ।

यो विश्वकपको प्रमुख दाबेदार मानिएको ब्राजिल पाँच पटक विश्वविजेता रहे पनि सन् २००२ यता फाइनल पुग्न सकेको छैन । 

सन् २०१४ मा आफ्नै भूमीमा आयोजित विश्वकपको सेमिफाइनलमा पुगेको ब्राजिल त्यसबेला जर्मनीसँग ७–१ को लज्जास्पद नतिजामा पराजित भएको थियो । पछिल्लो संस्करणको क्वार्टरफाइनलसम्म पुगेको ब्राजिल त्यहाँ पनि बेल्जियमसँग पराजित भएको थियो ।

ब्राजिल विश्वकपको पहिलो संस्करणदेखि हालसम्मका सबै संस्करण खेल्ने एकमात्र टिम हो । टिटेको प्रशिक्षणमा रहेको ब्राजिल विश्वकपको समूह चरणका पछिल्लो १५ खेलमा हार बेहोरेको छैन । यस्तै, ब्राजिल सन् १९८२ यता समूह विजेताको रुपमा अन्तिम १६ मा पुगेको छ ।

तुलनात्मक रुपमा सर्वियालाई भने समूह ‘जी’ को कमजोर टिमको रूपमा लिइएको छ । सर्वियाले विश्वकपको पछिल्लो तीन संस्करणमा समूह चरण पार गर्न सकेको छैन । तर, विश्वकपको छनोटमा आठ खेलमा अपराजित रहँदै कतार आएको सर्विया ब्राजिलका लागि सहज प्रतिद्वन्द्वी नहुने पक्का छ ।

विश्वकपको पछिल्लो संस्करणमा पनि ब्राजिल र सर्विया एकै समूहमा थिए । जहाँ ब्राजिलले सर्वियालाई २–० ले पराजित गरेको थियो । फरवार्ड नेइमार यो खेलमा प्रभाव पार्न सक्ने ब्राजिलका खेलाडी हुन् । ब्राजिलको सर्वकालीन उच्च गोलकर्ता बन्ने दौडमा रहेका नेइमारले अब तीन गोल गरे पेलेको नाममा रहेको यो कीर्तिमान आफ्नो नाममा बनाउनेछन् । नेइमारले विश्वकपको पछिल्लो दुई संस्करणमा ६ गोल र दुई असिस्ट गरेका छन् ।

एलेक्जान्ड्रो मिट्रोभिच सर्वियाबाट खेलमा प्रभाव पार्न सक्ने खेलाडी हुन् । विश्वकपको छनोटमा सर्वियाले खेलेको आठ खेलमा उनले आठ गोल गरेका छन् । उनीअघि नेदरल्यान्ड्सका मेम्फिस डिपे र इंग्ल्यान्डका ह्यारी केनले मात्र छनोटमा धेरै गोल गरेका थिए । दुवैले समान १२ गोल गरेका थिए । फुलहमबाट व्यवसायिक फुटबल खेल्ने मिट्रोभिचले क्लबका १२ खेलमध्ये नौ गोल गरेका छन् ।