वासिङ्टन । ट्विटरका सयौँ कर्मचारीहरूले नयाँ मालिक एलोन मस्कको ‘अल्टिमेटम’ले राजीनामा दिएपछि ट्विटरमा ‘रिप ट्विटर’ र ‘गुडबाई ट्विटर’ ट्रेन्डिङ सुरु भएको छ ।
कर्मचारीहरूले सीईओ मस्कको कट्टर कामकाजी माहोल स्थापित गर्ने अल्टिमेटम पालना गर्न अस्वीकार गरेपछि बिहीबार कर्मचारीहरुले राजीनामा दिएका थिए । मस्कले कम्पनीको नयाँ नियम मान्न वा राजीनामा दिन कर्मचारीहरूलाई बिहीबार साँझ ५ बजेको समयसीमा दिएका थिए ।
त्यसपछि ट्विटरले सोमबारसम्म आफ्नो कार्यालय बन्द राख्न निर्देशन दिएको छ । नोभेम्बर २१ मा कार्यालयहरू खुल्ने बीबीसीको रिपोर्टमा उल्लेख छ ।
ट्विटरको नयाँ भद्रगोल के हो ?
बिहीबारको अन्तिम मितिसम्म ट्विटरका धेरै कर्मचारीहरूले राजीनामा दिएको सीएनबीसीले रिपोर्ट गरेको छ । प्रविधि विषयका रिपोर्टरहरूले ट्विटरको सामूहिक राजीनामाको रिपोर्टको पुष्टि गरेका छन् ।
पत्रकार एलेक्स हेथले ट्विट गर्दै कम्पनीको आन्तरिक च्याट समूहहरूमा ‘सल्युट’ इमोजीले भरिएको र उनीहरूले मस्कको ‘ट्विटर २.०’ सांस्कृतिक रिसेटमा नबस्ने निर्णय गरेको ती इमोजीहरुले संकेत गरको लेखेका छन् ।
यसबीचमा ट्विटरले कारण नदिई नोभेम्बर २१ सम्म कार्यालय भवन बन्द रहने नोटिस जारी गरेको छ ।
बीबीसी, ब्लुमबर्ग र एएफपीले पाएको जानकारीअनुसार कार्यालयको पदचिह्न पाएका सबैलाई अस्थायी रूपमा निलम्बित गरिएको छ । “तपाईँको लचिलोपनको लागि धन्यवाद । कृपया सामाजिक सञ्जाल, प्रेस वा अन्य ठाउँमा कम्पनीको गोप्य जानकारीको बारेमा छलफल नगरी कम्पनी नीतिको पालना गरिदिनुहोस्,” नोटिसमा भनिएको छ ।
बुधबार बिहान मस्कले कर्मचारीहरूलाई नयाँ कट्टर माहोलमा काम गर्न वा यसलाई छोड्न समयसीमा तोकेपछि कर्मचारीहरु भड्किएका थिए ।
द वाशिंगटन पोस्टको रिपोर्टकाअनुसार मस्कले कर्मचारीहरूलाई इमेलमा ट्विटर अब इन्जिनियर–सञ्चालित अपरेसनमा जाने भएकोले अगाडि बढ्नको लागि अत्यन्त आक्रामक हुन आवश्यक रहेको बताएका थिए । उनले कर्मचारीहरूलाई एउटा आइकनमा क्लिक गर्न र बिहीबारसम्म नयाँ नियमको पालना गर्न र बस्न सहमत भए सोहीअनुरुप प्रतिक्रिया दिन निर्देशन दिएका थिए ।
सीएनबीसीले मस्कले उक्त इमेलपछि थप दुई इमेलहरू पठाएको जानकारी दिएको छ । जसमा कामदारहरूलाई कम्तीमा महिनामा एकपटक व्यक्तिगत बैठकहरू गर्न निर्देशन दिइएको र कर्मचारीहरूलाई टाढैबाट काम गर्न अनुमति दिएकोमा प्रबन्धकहरूलाई बर्खास्त गर्न सकिने बताइएको थियो ।
मस्कको नयाँ निर्देशनले कर्मचारीहरू असन्तुष्ट बनेका थिए । मस्क यसअघि ट्विटरका करिब आधा संख्यामा पूर्ण–कालीन कर्मचारीहरूलाई पदबाट बर्खास्त गरेपछि आलोचित भएका थिए ।
बिहीबार बेलुकादेखि इन्जिनियरहरू र अन्य कर्मचारीहरुले ५ बजेको म्यादभन्दा ठिक अगाडि आन्तरिक च्याट समूहहरूमा ‘अलबिदा सन्देशहरू’ पोस्ट गर्न थालेको सीएनबीसीले उल्लेख गरेको छ ।
तर, जब ट्विटरको सामूहिक राजीनामाको खबर सार्वजनिक भयो, क्षणभरमै ‘रिप ट्विटर’ र ‘अलबिदा ट्विटर’ माइक्रोब्लगिङ वेबसाइटमा ट्रेन्डिङ भएको छ । ‘रिप ट्विटर’ त शुुक्रबार दिनभर ट्रेन्डिङमा परेको छ । ट्विटर प्रयोगकर्ताहरुले मस्क र ट्विटरको असफलतासँग सम्बन्धित मिमहरु कटाक्ष गर्दै पोस्ट गर्न थालेका छन् ।
मस्कको प्रतिक्रिया
यो नयाँ विवादमा मस्कले ट्विटरमा मिमहरु साझेदार गर्दै र अनौठो टिप्पणीहरू गरेका छन् । एउटा पोस्टमा उनले एक मिम सेयर गरे । जसमा “हामीलाई मद्दत गर्नुहोस् लिग्मा जोनसन” उल्लेख छ ।
राहुल लिग्मा र ड्यानियल जोनसन दुई ट्विटर कर्मचारी हुन्, जसलाई बर्खास्त गरिएको थियो र पछि पुनः नियुक्त गरिएको थियो । मस्कले उनीहरुको पुनः नियुक्तिपछि सो जोडीसँग एउटा फोटो सेयर गर्दै उनीहरूलाई बर्खास्त गर्नु सबैभन्दा ठूलो गल्ती भएको भन्दै ट्विटमार्फत स्वागत गरेका थिए ।
यसअघि, उनले ट्रेन्डिङमा चलिरहेको ‘रिप ट्विटर’लाई सेयर गरेका थिए । उनले अनौठो ट्विटहरू क्रमिकरुपमा पोस्ट गर्दै ट्विटरले यसको उच्चतम प्रयोग गरिसकेको बताएका थिए ।
गत महिना ४४ बिलियन डलरको सम्झौतामा ट्विटर खरिद गर्नुअघि उनले यस्तै ट्विट पोस्ट गरेका थिए । त्यसबेला उनी सन फ्रान्सिस्कोस्थित ट्विटरको मुख्यालयमा हात धुने सिंक बोकेर प्रवेश गरेका थिए । अंग्रेजीमा सिंकको एउटा अर्थ डुब्नु हुन्छ भने अर्को अर्थ हात धुन मिल्ने उपकरण पनि हो । -बुमलाइभडटइनबाट