काठमाडौं । भाटभटेनी सुपरमार्केटको नामबाट स्क्याम लिंक फैलिएको पाइएको छ ।
फेसबुक म्यासेन्जरमा तथा ग्रुपमा नयाँ शाखा खुलेको भन्दै लिंक फैलाइएको छ । भाटभटेनी सुपरमार्केटको जस्तो नक्कली वेबसाइट देखाएर माथि बधाई लेखिएको पाइएको छ । उक्त लिंकमा प्रवेश गरेपछि प्रश्नको उत्तर दिन सकेमा पाँचहजार रुपैयाँ जित्न सकिने उल्लेख छ ।
त्यसमा भाटभटेनी सुपरमार्केटका प्रबन्ध निर्देशकसहितको तस्बिर राखिएको छ । वेबसाइटको तल प्रशस्तै प्रतिक्रिया राखिएको छ तर धेरैजसो नक्कली खाताजस्तो देखिन्छ ।
उक्त प्रश्नको जवाफ दिने क्रममा ह्याकर प्रयोगकर्ताको डिभाइसम्म पुग्न सक्छन् ।
प्रश्न सजिला भएकाले जो कोहीले पनि उत्तर दिन तयार हुने र उनीहरु सीधै डिभाइसमा प्रवेश गर्न सक्ने जोखिम बढी हुने देखिन्छ ।
यता भाटभटेनीले आफ्नो आधिकारिक फेसबुक पेजमार्फत उक्त विज्ञापनमा कुनै पनि भूमिका नरहेको र कुनै पनि प्रश्नको उत्तर नदिन अनुरोध गरेको छ ।
कुनै पनि ग्रुप तथा म्यासेन्जरमा आएका त्यस्ता लिंकलाई बेवास्ता गरिदिन अनुरोध गर्दै आफ्ना साथी र परिवारमा पनि सेयर नगर्न भनेको छ ।