काठमाडौं । नेपालको अग्रणी साहित्यिक पत्रिका ‘अभिव्यक्ति’ले नेपाल बंगलादेश स्रष्टा सम्मेलनको आयोजना गर्दै बंगलादेशका स्रष्टाहरूको स्वागत गरेको छ । 

शुक्रबार काठमाडौंमा आयोजित कार्यक्रममा अभिव्यक्तिका संरक्षक, साहित्यिक पत्रकार नगेन्द्रराज शर्माले अभिव्यक्तिले बंगलादेशका साहित्यकारहरूको रचना अनुवाद गरी छाप्न सकिने प्रसंग उठाए । उनले ‘यताको साहित्य उता र उताका साहित्य यता छापियोस्’ भन्ने विषयमा जोड दिए ।

कार्यक्रममा अर्का साहित्यिक पत्रकार रोचक घिमिरेले केही समय बाङ्गला भाषामा सम्बोधन गर्दै बाङ्गला भाषा र नेपाली भाषामा समानता रहेकोले चाहेको खण्डमा बंगलादेशका सर्जकहरूले नेपाली भाषा बुझ्न सकिने बताए ।

कार्यक्रममा बंगलादेश नेपाल मैत्री समाजका अध्यक्ष मशहूर अहमदले नेपालमा पाएको न्यानो मायाको प्रसंशा गरे । उनले आफूहरूले शताब्दी वाङ्मय पुरुष सत्यमोहन जोशीसँग भेट गर्न पाएकोमा खुसी लागेको बताए ।

सो अवसरमा बंगलादेशका स्रष्टाहरू शेली सेनगुप्ता, डा. अनवरा सैयद हक, प्रा.डा. दिलारा हाफिजले कविता वाचन गरे भने गायक काजलकुमार मुखर्जीले ‘एक्ला चलो रे...’ गाउँदै रवीन्द्र संगीत प्रस्तुत गरे ।

कार्यक्रममा मोहम्मद महशूर रहमान र सलाउद्दिन कुटुले पनि नेपाल बंगलादेशको साहित्यका बारेमा बोले ।

सोही अवसरमा नेपाली साहित्यकाररू पवन आलोक, प्रा.डा. लक्ष्मणप्रसाद गौतम, प्रतीक ढकाल, श्रीओम रोदन, रामप्रसाद पन्त, शकर भारतीले साहित्य कला कुनै पनि भूगोलमा नबाँधिने बताए । 

बंगलादेशका सात स्रष्टा तीन दिनदेखि काठमाडौंमा छन् ।